Էրդողանի հեղինակությանն ամենամեծ հարվածը կհասցվի մարտի 25-ին. ԶԼՄ-ներ

Թուրքիայում գաղտնի հեռախոսազրույցների բացահայտման արդյունքում դժվար վիճակում հայտնված վարչապետ Ռեջեփ Թայիփ Էրդողանի հեղինակությանը հասցվելիք ամենալուրջ հարվածը, թերևս, կհասցվի մարտի 30-ին տեղի ունենալիք տեղական ինքնակառավարման մարմինների ընտրությունների նախաշեմին:

Արտասահմանյան ԶԼՄ-ները հայտնում են, որ ՏԻՄ ընտրություններից 5 օր առաջ' մարտի 25-ին հրապարակվելիք հեռախոսային խոսակցությունների ձայնագրությունները ցնցող հարված կհանդիսանան Էրդողանի և նրա կառավարության մյուս ներկայացուցիչների համար: Նշվում է, որ այդ ժամանակ այնպիսի բովանդակությամբ հեռախոսազրույցներ են հրապարակվելու, որ Էրդողանն ու իր շրջապատը «ամաչելու են անգամ փողոց դուրս գալ»:

Երկու ամիս առաջ թուրքական իրավապահ մարմինների կողմից անցկացված գործողությունների արդյունքում բացահայտվել էր Էրդողանի, նրա որդիների, կառավարության անդամների խոշոր ծավալների հասնող կոռուպցիոն գործարքները: Այդ փաստերն արտացոլող հեռախոսային զրույցների ձայնագրությունները համացանցում հայտնվելուց հետո իշխող կուսակցության և, հատկապես Էրդողանի հեղինակությունն ու վարկանիշը Թուրքիայում խիստ ընկել են:

Համացանցում հայտնված հեռախոսային խոսակցությունների ձայնագրություններում Էրդողանը հանձնարարում է իր ավագ որդուն ոստիկանությունից թաքցնել Ստամբուլի տանը պահված տասնյակ միլիոնավոր դոլարի կանխիկ գումարը: Այդ ցնցող բացահայտումը պատճառ դարձավ Թուրքիայում համատարած կոչերի' Էրդողանի հրաժարականի պահանջով:

Թուրքիայում բացահայտված կոռուպցիոն սկանդալը կարող է վերջ դնել Էրդողանի քաղաքական կարիերային, և նա կարող է կորցնել ոչ միայն վարչապետի իր պաշտոնը և մոտ ապագայում նախագահ դառնալու հնարավորությունը, այլև իր հանցագործությունների համար ենթարկվել երկարատև ազատազրկման:

Թուրքական «Զաման» թերթի սյունակագիր Մումթազեր Թյուրքոնեն, առաջ անցնելով սպասվող ներքաղաքական զարգացումներից, գրում է, որ Թուրքիայում քաղաքական ուժերն ու հասարակությունը պետք է սկսեն նախապատրաստվել հետէրդողանյան ժամակաշրջանին: Նա համոզմունք է հայտնել, որ վարչապետ Էրդողանի «ոտքերի տակից իշխանության գորգն արդեն քաշել են, և նա այլևս չի կարողանալու կառավարել Թուրքիան»:

«Թուրքիայում հետէրդողանյան ժամանակաշրջանին պետք է պատրաստվեն թե՛ քաղաքական ուժերը, թե՛ հասարակությունը: Այդ գործընթացում պետք է դերակատարում ստանձնի նաև Թուրքիայի նախագահ Աբդուլլահ Գյուլը: Մարտի 30-ը կարող է լինել այդ ժամանակաշրջանի սկիզբը»,-նշել է Մումթազեր Թյուրքոնեն: