Հայաստանի բրենդն ստեղծող մասնագետներն առաջիկայում Հայաստան կժամանեն. The globe and mail

Հայաստանի նոր բրենդի ձևավորման նպատակով մի քանի շաբաթից Հայաստան կժամանի «Cundari Group» գործակալության մասնագետների խումբը: Ինչպես հաղորդում է The globe and mail պարբերականը, այն կգծագրի Հայաստանի նոր լոգոն և կմշակի մեր երկիրն արտաքին ներդրումների համար ավելի գրավիչ դարձնելու և աճող զբոսաշրջային ինդուստրիան վերափոխելու մարտավարությունը:

Հայաստանի նոր բրենդի ստեղծման և զարգացման նպատակով Հայաստանի մրցունակության ազգային հիմնադրամը պայմանագիր է կնքել կանադական «Cundari Group» և Նյու Յորքի «GK Brand» գովազդային գործակալությունների հետ: Նկատի ունենալով, որ 2015 թվականին' Հայոց ցեղասպանության 100-րդ տարելիցին, Հայաստանը կհայտնվի միջազգային հանրության և մեծ թվով արտասահմանյան լրատվամիջոցների ուշադրության կենտրոնում՝ Հայաստանի կառավարությունը որոշել է սահմանել երկրի վերաբրեդավորման խիստ ժամանակացույց, որի նպատակն է արտաքին ներդրումների և զբոսաշրջության ոլորտի զարգացումը:

Հայաստանի վերաբրենդավորման նախագծի առանցքային նպատակն է գովազդային արշավի միջոցով Հայաստան գրավել ավելի մեծ շահույթ ապահովող օտարեկրյա զբոսաշրջիկների: Թիրախավորված շուկաներն են Ռուսաստանը, Վրաստանը և Իրանը: Նախատեսվում է երկրի բրենդը խթանել նաև Գերմանիայի և Ֆրանսիայի քաղաքային կենտրոններում: Քանի որ Հայաստանը ծովափնյա երկիր չէ, հիմնական շեշտը կդրվի պատմա-մշակութային տուրիզմի զարգացմանը: Նախագծի շրջանակներում ծրագրվում է վերականգնել ավելի քան 1000-ամյա պատմություն ունեցող Տաթևի վանքը:

Գովազդային գործակալությունները պատասխանատու կլինեն մինչ 2015 թվականի ապրիլը Հայաստանի համար հաղորդակցության ծրագրի ստեղծման համար: