Չարենցի ծննդյան օրը կվերածվի տոնի

Հայ գրականության ականավոր դեմքերից մեկի' բանաստեղծ Եղիշե Չարենցի ծննդյան 117-ամյակը չարենցասերներին հավաքել էր պոետի երևանյան հուշահամալիրի մոտ: Մարտի 13-ին' Չարենցի ծննդյան օրը, տարբեր հանրակրթական դպրոցների աշակերտներ, ըստ ավանդույթի, իրենց ելույթներով հարգանքի տուրք մատուցեցին Չարենցին: Նրանք միասին արտասանեցին նաև Չարենցի «Ես իմ անուշ Հայաստանի» բանաստեղծությունը:

«Այսօր մեր հանճարի ծննդյան օրն է: Ինչպես միշտ, մենք հավաքվել ենք և կազմակերպելու ենք միջոցառումների մեծ շարք: Պոեզիայի ժամն ավարտվելուց հետո բոլորիդ հրավիրում եմ Չարենցի տուն-թանգարան, բացվելիք «Կոմիտաս և Չարենց» խորագրով հետաքրքիր և յուրօրինակ ցուցահանդեսին, որտեղ կներկայացվեն Կոմիտասի մասունքները»,- ասաց Չարենցի տուն-թանգարանի տնօրեն Լիլիթ Հակոբյանը:

Հակոբյանն ընդգծեց, որ ցուցահանդեսը կուղեկցվի նաև համերգով, որի ընթացքում կհնչեն Կոմիտասի ստեղծագործություններից: Առաջին անգամ կներկայացվի նաև Չարենցի «Երկիր Նաիրի» վեպի իտալերեն թարգմանությունը:

Եղիշե Չարենցի տուն-թանգարանում դարձյալ առաջին անգամ կցուցադրվի բացառիկ մի նմուշ' Կոմիտասի թաշկինակը: «Այս թաշկինակը Կոմիտասը ժամանակին նվիրել է դաշնակահարուհի Աղավնի Մեսրոպյանին: Չարենցը մտերիմ է եղել Մեսրոպյանի հետ և պաշտել է Կոմիտասին: Բանաստեղծը հաճախ լինում էր Թիֆլիսում և մասնակցում էր այն բոլոր համերգային երեկոներին, որոնց ընթացքում հնչում էին Կոմիտասի գործերը: Մեսրոպյանը ևս Կոմիտաս էր կատարում: Հանդիպումներից մեկի ժամանակ Աղավնին Չարենցին է ցույց տվել Կոմիտասի թաշկինակը, որի վրա Կոմիտասը գրած է եղել «Օ’, հիասքանչ դու լեզու» երգի տողերը և նվիրել նրան: Չարենցը սաստիկ հուզվել է դրանից և խնդրել իրեն նվիրել այդ թաշկինակը: Աղավնի Մեսրոպյանը խոստացել է Երևան տեղափոխվելուն պես այն նվիրել Չարենցին, սակայն չի հասցրել իրագործել իր մտադրությունը»,- «Արմենպրես»-ի թղթակցի հետ զրույցում ավելի վաղ նշել էր Չարենցի տուն-թանգարանի տնօրեն Լիլիթ Հակոբյանը: Չարենցի մահվանից հետո Աղավնի Մեսրոպյանը թաշկինակը նվիրել է Չարենցի դստերը' Անահիտին:

Երևանի քաղաքապետարանի աշխատակազմի կրթության վարչության պետ Գայանե Սողոմոնյանը հավաքվածներին շնորհավորեց Չարենցի ծննդյան օրվա առիթով և կարևորեց միջոցառման անցկացումը: Նա նաև ընթերցեց Ստեփանակերտի Եղիշե Չարենցի անունը կրող դպրոցի շնորհավորական ուղերձը ' մեծանուն պոետի ծննդյան օրվա առթիվ:

«Չարենցի մասին լավագույն խոսքն ասում են իր գրած բանաստեղծությունները: Կարծում եմ, որ Հայաստանում չկա իրեն հարգող մի մարդ, որ չիմանա «Ես իմ անուշ Հայաստանին», չգիտի Չարենցի գրվածքները: Սա մեր ազգային հպարտությունն է»,-նշեց Հայաստանի գրողների միության նախագահ Էդվարդ Միլիտոնյանը:

Հայ մեծ պոետ Եղիշե Չարենցը (իսկական անունը' Եղիշե Աբրահամի Սողոմոնյան), ծնվել է 1897թ. մարտի 25-ին Կարս քաղաքում' բազմազավակ հայի ընտանիքում: 1908թ. Չարենցն ընդունվել է Կարսի վարժարան, ուր դպրոցական «Գարուն» ալմանախում հրատարակվել են նրա բանաստեղծությունները: Ստանալով հնգամյա կրթություն' արդեն ձևավորվող պոետն իր գիտելիքները հարստացրել է անդադար կարդալու միջոցով: 1914թ. Կարսում լույս է տեսել գրողի «Չարենց» գրական կեղծանունով «Տխուր ու գունատ աղջկա 3 երգերը…» բանաստեղծությունների ժողովածուն: Չարենցը թարգմանել է Գյոթեի, Հայնեի, Հյուգոյի , Ուիթմենի, Վերհարնի, Ռիլկեի, Պուշկինի, Նեկրասովի, Լերմոնտովի, Գորկու, Մայակովսկու, Եսենինի և ուրիշների գործերից, հանրակրթական դպրոցների համար կազմել է դասագրքեր, խմբագրել ու հրատարակել է հայ բանահյուսության նմուշներ, հայ դասական և ժամանակակից գրողների գրքեր: 1935թվականից Չարեն ցի դեմ սկսվել են քաղաքական հալածանքներ: 1937թ. հուլիսին բռնադատվել է, նոյեմբերի 27-ին մահացել Երևանի բանտի հիվանդանոցում, գերեզմանի տեղն անհայտ է: Արդարացվել է հետմահու: Սահմանվել է ՀԳՄ Չարենցի անվան մրցանակ: ՀՀ մեկ հազարանոց թղթադրամի վրա պատկերված է Չարենցի դիմ անկարը, Երևանում գործում է նրա տուն-թանգարանը: Չարենցի անունով կոչվել են փողոցներ, դպրոցներ, գրադարաններ Երևանում, ՀՀ, ԼՂՀ և Ջավախքի քաղաքներում, Չարենցավան քաղաքը, Երևանի գրականության և արվեստի թանգարանը: Երևանում կառուցվել է նրա հուշահամալիրը, նրա անվան դպրոցի առջև տեղադրված է բանաստեղծի կիսանդրին: