Անջելինա Ջոլին հայտարարել է, որ պատրաստվում է հերթական վիրահատության. Entertainment Weekly

Համաշխարհային Մամուլ 13 Մարտ, 2014 23:24

Ամերիկացի կինոաստղ Անջելինա Ջոլին հայտարարել է, որ պատրաստվում է հերթական վիրահատության, քանի որ ծագումնաբանական թեստերը ցույց են տվել կաթնագեղձի քաղցկեղի առաջացման վտանգը: Մարտի 13-ին հաղորդել է Entertainment Weekly հանդեսը:

«Ինձ սպասում է ևս մեկ վիրահատություն, որը ես դեռ չեմ ունեցել: Ես շատ ուրախ եմ, որ նման որոշում եմ ընդունել: Բախտս շատ բերել է, որ այսպիսի հրաշալի բժիշկներ ունեմ»,- հայտարարել է Ջոլին հանդեսում հրապարակված հարցազրույցում:

«Ես ինձ շատ ավելի մոտ եմ զգում այն կանանց, որոնք անցել են նման բաների միջով: Ես շատ զգացված եմ բազմաթիվ մարդկանց աջակցությունից և բարությունից»,- հավելել է նա:

Դերասանուհու խոսքով՝ իր բախտը բերել է, որ իրեն առիթ է վիճակվել աշխատելու «Չհուսաբեկվածը» ֆիլմում, որը պետք է վարձույթ դուրս գա այս տարի: «Դա մի բանի է, հանուն որի արժե արագ ապաքինվել և վերադառնալ աշխատանքի»,- ընդգծել է Ջոլին:

2013 թվականի ամռանը հայտնի էր դարձել, որ հոլիվուդյան կինոաստղ Անջելինա Ջոլին, ում մայրը 56 տարեկան հասակում մահացել է կրծքագեղձի քաղցկեղից, տարել է կրծքագեղձերի հեռացման վիրահատություն: Ինչպես դերասանուհին ինքն է պատմել New York Times թերթի սյունակում, ինքը դա որոշել է այն բանից հետո, երբ բժիշկներն իր մոտ հայտնաբերել են BRCA1 գենը, որն առաջ է բերում կաթնագեղձի և ձվարանների քաղցկեղի զարգացում:

Վիրահատությունը կրծքագեղձի քաղցկեղի զարգացման վտանգն 87 տոկոսից նվազեցրել է մինչև 5 տոկոս: