Երկրի ընդերքն այնքան ջուր է պարունակում, որքան բոլոր օվկիանոսները միասին վերցված. Nature

Գետնի տակ հարյուրավոր կիլոմետրերի հասնող խորության վրա այնքան ջուր կա, որքան համաշխարհային օվկիանոսում, թեև, հիդրօքսիլային խմբերի տեսքով՝ ռինգվուդիտ միներալի կազմում: Այդ մասին ասված է Nature հանդեսում հրապարակված հոդվածում:

Երկրաշարժերի ժամանակ սեյսմիկ ալիքների տարածման դիտարկումները ցույց են տալիս, որ դրանց արագությունը կտրուկ փոխվում է Երկրի վերին և ստորին միջնապատյանների սահմանին՝ 410-660 կիլոմետր խորության վրա: Գիտնականները ենթադրել են, որ դա տեղի է ունենում այն փոփոխությունների պատճառով, որոնց մեծ խորության վրա ենթարկվում է ձիթակնը, որը կազմում է վերին միջնապատյանի մեծ մասը: Ձիթակնի այդ ձևն անվանել են ռինգվուդիտ:

Էդմոնտոնի (Կանադա) Ալբերտայի համալսարանից Գրեմ Փիրսոնը և նրա գործընկերներն առաջին անգամ ռինգվուդիտի նմուշ են հայտնաբերել ալմաստի մեջ՝ խայտի տեսքով: Ալմաստը ցույց է տվել, որ նմուշի քաշի 1,5 տոկոսը կազմում է ջուրը հիդրօքսիլային խմբերի տեսքով (OH): Եթե դա ռինգվուդիտի՝ վերին և ստորին միջնապատյանների միջև սահմանային գոտու բնորոշ ներկայացուցչի նմուշ է, ապա դրանում, ըստ գիտնականների հաշվարկների՝ պետք է պարունակվի 1,4*10^21 կիլոգրամ ջուր:

«Այդ նմուշը շատ ծանրակշիռ ապացույցն է այն բանի, որ խորը գետնի տակ կան տիրույթներ, որոնք պարունակում են ջուր: Երկրի ընդերքում տարանցիկ գոտին պետք է պարունակի այնքան ջուր, որքան բոլոր օվկիանոսները միասին վերցված»,-պարզաբանել է Փիրսոնը: