Ռուսաստանում նախագահական ընտրությունների երկրորդ փուլ չի սպասվում. նախնական տվյալներով՝ Պուտինը ստացել է 64,40% ձայն

Ռուսաստանի ներկայիս վարչապետ, նախագահի թեկնածու Վլադիմիր Պուտինը նախնական տվյալներով ստացել է  ընտրողների ձայների 64,40%-ը: Այդ մասին հաղորդում է «Ռիա նովոստի»-ն՝ վկայակոչելով ԿԸՀ հրապարակած արդյունքները: 

Ամփոփվել է քվեաթերթիկների 50%-ից ավելին: Երկրորդ հորիզոնականում է կոմկուսից առաջադրված Գենադի Զյուգանովը (17,13%), որին հաջորդում է գործարար Միխայիլ Պրոխորովը (6,97%): 

Լիբերալ-դեմոկրատական կուսակցության առաջնորդ Վլադիմիր Ժիրինովսկին ստացել է ընտրողների ձայների 6,71%-ն, իսկ «Արդար Ռուսաստան» կուսակցության առաջնորդ Սերգեյ Միրոնովը՝ 3,72%-ը: 

Հատկանշական է, որ ընտրությունները անարդար է ճանաչել Գենադի Զյուգանովը, իսկ Միրոնովը հայտարարել է, որ քվեարկության արդյունքներն օբյեկտիվ են:

Այսպիսով, թեև ընտրությունների վերջնական արդյունքները դեռևս հայտնի չեն, այնուամենայնիվ կարելի է վստահաբար ասել, որ նախագահական ընտրությունների երկրորդ փուլ չի սպասվում և որ Ռուսաստանի նախագահ է ընտրվել Վլադիմիր Պուտինը: