Վրատանի վարչապետը` երեք տոննա ադրբեջանական հերոինի առգրավման մասին

Վրաստանի վարչապետ Իրակլի Ղարիբաշվիլին շնորհավորել է ներքին գործերի նախարար Ալեքսանդր Չիկաիձեին և նրա գերատեսչությանը` թմրանյութերի աննախադաեպ խմբաքանակ առգրավելու առնչությամբ: Այս մասին, ինչպես հաղորդում է «Արմենպրես»-ը, հայտնում է «Նովոստի-Գրուզիա» լրատվական գործակալությունը:

«Չիկաիձեի գերատեսչությունը թմրանյութերի մեծ քանակություն է առգրավել: Այդքան մեծ քանակությամբ թմրանյութեր դեռևս չեն առգրավվել ոչ միայն մեր, այլ նաև հարևան երկրներում», -ասել է Ղարիբաշվիլին:

Հուլիսի 11-ին վրացի իրավապահները հեղուկ հերոինի մեծ խմբաքանակ են հայտնաբերել բեռնատար ավտոմեքենայում, որը Վրաստան էր ժամանել Ադրբեջանից և մեկնում էր Թուրքիա: Թմրանյութը տեղափոխում էին հեղուկ օճառի 30 լ տարողությամբ տարաներով: Թմրանյութի ընդհանուր քաշը կազմել է 2,79 տ:

Վրաստանի ՆԳՆ-ն այդ առնչությամբ հայտարարել էր, որ նման քանակությամբ թմրանյութի առգրավումն աննախադեպ իրադարձություն է Վրաստանի համար: Հայտարարության մեջ նշվել էր, որ քրեափորձագիտական ծառայության նախնական տվյալներով` առգրավված թմրանյութը պարունակումէ 80 տոկոս հերոին, որի շուկայական գինը կազմում է հարյուրավոր միլիոն դոլարներ:

Գործի շրջանակում ձերբակալվել են Վրաստանի երկու քաղաքացիներ: Թմրանյութերի ապօրինի փոխադրման փաստով հետաքննություն է սկսվել:

Ադրբեջանական «Ազադլըգ» թերթը գրում է, որ Վրաստանում խոշոր չափի թմրանյութի բացահայտումը, որը չի վրիպել միջազգային մամուլի ուշադրությունից, դժվար դրության մեջ է դրել Ադրբեջանի իշխանությանը: Այդ մասին գրել են BBC-ից սկսած մինչև Նամիբիայի լրատվական գործակալությունները: Միջազգային լրատվամիջոցներն ուշադրության են հրավիրել այն բանի վրա, թե այդ ինչպես է մոտ 3 տ հերոինն անցկացվել Ադրբեջանի սահմանով, այն դեպքում, երբ այդ երկրի իշխանությունները հայտարարում են թմրանյութերի ապօրինի շրջանառության դեմ ակտիվորեն պայքարելու մասին:

«Ադրբեջանի իշխանությունը լրջորեն տագնապած է, քանի որ աշխարհով մեկ հայտարարում է, թե պայքարում է թմրանյութերի ապօրինի շրջանառության դեմ: Այդ դեպքում, ինչպես է ստացվում, որ մոտ 3 տ հերոինը հանգիստ կերպով անցկացվել է Ադրբեջանով, և իրավապահ մարմինները չեն կարողացել տեսնել այդչափ թմրանյութը: Ադրբեջանի իշխանությունը հարկադրված է պատասխանել այդ հարցերին: Ենթադրվում է, որ վիճակից դուրս գալու համար ադրբեջանական իշխանությունը կարող է «զոհել» որոշ «մանր ձկների»: Սակայն համոզիչ չէ, որ դրանով հնարավոր կլինի քողարկել այդ խայտառակ իրադարձությունը, քանի որ բացահայտ է, որ հարցի հետևում «շնաձկներ» են կանգնած, իսկ նրանց «զոհաբերելը» հավատալի չէ:

Որոշ ենթադրությունների համաձայն՝ այդ իրադարձությունն ուղղված է Ադրբեջանի իշխանության մերկացմանը: Դրանով համոզվածները դա բացատրում են այն բանով, որ իրադարձությունն անմիջապես միջազգային մակարդակով հանրայնացվել է: Մյուս կողմից՝ Վրաստանի իշխանությունը ջերմ հարաբերություններ ունի Ադրբեջանի իշխանության հետ, և միջադեպը կարող էր հարթվել առանց աղմուկի: Սակայն, երևում է, գործողությունն իրականացվել է անկախ Վրաստանի իշխանության կամքից», -եզրակացնում է «Ազադլըգ»-ը: