Ադրբեջանում հերոսացնում են Քարվաճառում ԼՂՀ ուժերի կողմից գերեվարված դիվերսանտներին

Ադրբեջանում արդեն հերոսացնում են Լեռնային Ղարաբաղի Հանրապետության Շահումյանի շրջանի Քարվաճառի տարածքում ԼՂՀ անվտանգության և պաշտպանության ուժերի կողմից գերեվարված ադրբեջանցի դիվերսանտներին: «Արմենպրես»-ի հաղորդմամբ, virtualaz.org կայքը հայտնում է, որ Արդրբեջանում արդեն ստեղծվել է Քարվաճառում ձերբակալված Ադրբեջանի քաղաքացիների «Իրավունքների պաշտպանության կոմիտե», որն այսօր Բաքվում իր առաջին մամուլի ասուլիսն է անցկացրել: Կոմիտեի ղեկավար Էլխան Սալահովը հայտարարել է, որ իրենց նպատակը մի քանի օր առաջ գերեվարված Ադրբեջանի քաղաքացիներ Դիլգամ Ահմեդովի (իրականում' Ասքերովի), Շահբազ Գուլիևի և դիմադրություն ցույց տալու ժամանակ սպանված Հասան Հասանովի «իրավունքների պաշտպանությունն է և կենդանի մնացած ադրբեջանցիների ազատությունը պահանջելն է»:

Միջոցառմանն ունեցած ելույթում Ադրբեջանի խորհրդարանի իշխող «Ենի Ազերբայջան» կուսակցության պատգամավոր Այդըն Միրզազադեն հայտարարել է, որ ձերբակալված ադրբեջանցիների նկատմամբ հայերի գործողությունները, իբր, չեն համապատասխանում միջազգային իրավունքի նորմերին: Նրա խոսքով՝ Ադրբեջանի քաղաքացիները «ոչ թե պետական սահման են խախտել, այլ անցել են հակամարտ զորքերի շփման գիծը», և որ նրանց այդ քայլը «պետք է գնահատել որպես հերոսության օրինակ, ինչպես դա արվել է Ռամիլ Սաֆարովի, Մուբարիզ Իբրահիմովի դեպքերում»:

Կայքը հայտնում է, որ հայրենասիրական մեծ պաթոսով սկսված կոնֆերանսը կիսատ է մնացել էլեկտրական հոսանքի անակնկալ անջատվելու պատճառով: Թեև միջոցառման մասնակիցները և լրագրողները կազմակերպիչներից պահանջել են շարունակել միջոցառումը, սակայն վերջիններս անգամ առանց ընթերցելու իրենց պատրաստած դիմումը, պատգամավոր Այդըն Միրզազադեի գլխավորությամբ հեռացել են դահլիճից:

Նշվում է, որ միջոցառմանը չեն մասնակցել «պաշտպանության կոմիտեի» մյուս պատգամավոր անդամները' Գանիրա Փաշաևան, Ֆազիլ Մուստաֆան և մնացածները և հասարակայնության այլ անդամներ, իսկ միջոցառմանը հրավիրված դիվերսանտների ազգականները այն լքել են սկսվելուց մի քանի րոպե հետո: