ԱՎԾ-ը իր մեթոդաբանությամբ ի վիճակի չէ արտացոլել ճշգրիտ վիճակագրություն. Հրանտ Բագրատյան

Մեկնաբանելով այսօր ՀՀԿ-ի 13-րդ համագումարում Սերժ Սարգսյանի արտահայտած այն միտքը, որ իշխանությունների վարած տնտեսական քաղաքականությունը քննադատող ընդդիմախոսները անտեսում են անգամ միջազգային մասնագիտացված կառույցների՝ Հայաստանի Ազգային վիճակագրական ծառայությանը տված բարձր գնահատականները՝ կասկածի տակ դնելով դրա հրապարակած ցուցանիշները, Լուրեր.com-ի հետ զրույցում ՀՀ նախկին վարչապետ Հրանտ Բագրատյանն ասաց. «Ես իրեն խորհուրդ կտամ, որ ինքն էլ չհավատա ԱՎԾ-ի ցուցանիշներին: Գոյություն ունեն նորագույն տեսություններ, որոնք փաստում են, որ ազգային վիճակագրական ծառայությունը իր մեթոդաբանությամբ, իր մասնագիտական կարողությամբ ի վիճակի չէ արտացոլելու ճշգրիտ վիճակագրություն»։

Հիշեցնենք, որ անդրադառնալով իշխանությունների ընդդիմախոսների՝ առաջինների տնտեսական քաղաքականությանն ուղղված քննադատությանը, Սերժ Սարգսյանն իր ելույթում ասել է. «Ոչի՛նչ, որ միջազգային մասնագիտացված կառույցները շատ բարձր են գնահատում Ազգային վիճակագրական ծառայության աշխատանքը, դա քեզ համար խնդիր չէ. չէ՞ որ դու արդեն մեծ փորձ ունես Վենետիկի հանձնաժողովին, միջազգային ֆինանսական կազմակերպություններին, Եվրոպական ամենատարբեր կառույցներին, հանձնակատարներին, ԵԱՀԿ-ին, անգամ ԱՄՆ-ին, Ռուսաստանին ու Ֆրանսիային մեղադրելու Հայաստանի իշխանությունների հետ գործարքի մեջ լինելու հարցում: Զավեշտ է, բայց փաստ, որ մարդիկ հողին են հավասարեցնում մեր վիճակագրությունը, երբ այն արձանագրում է դրական առաջընթաց ու աճ, և հաճույքով հավատում են, երբ վերջինս արձանագրում է անկում կամ նվազում»։