Թուրքերը Սուլեյման շահի 928 տարվա դամբարանատեղին հանձնում են իսլամիստ ահաբեկիչներին

Իրաքում և Սիրիայում իրագործած արյունալի կոտորածներիով օրակարգում գտնվող «Իրաքի և Լևանտի իսլամական պետություն» (ԻԼԻՊ) ահաբեկչական խմբավորմանը հաջողվել է խիստ վախեցնել Անկարային:

Ինչպես հաղորդում է «Արմենպրես»-ը, թուրքական «Թարաֆ» թերթը. մոտ երկու ամիս առաջ Իրաքի Մոսուլ քաղաքում Թուրքիայի հյուպատոսության 49 աշխատակիցներին պատանդ վերցրած ԻԼԻՊ-ը նրանց ազատ արձակելու դիմաց պահանջել է Սուլեյման շահի 928 տարվա դամբարանից դուրս բերել թուրք զինվորներին: ԻԼԻՊ-ի մարտիկների հետ ռազմական գործողություններից խուսափող Անկարան, ըստ «Թարաֆ»-ի, ընդունել է ահաբեկիչների այդ պահանջը և ներկայում մտածում է, թե ինչպես ներկայացնի հանրությանն այդ ցավալի հարցը:

Մարտին, երբ ԻԼԻՊ-ը սկսել էր ակտիվանալ Սիրիայում, Թուրքիայի այն ժամանակվա վարչապետ Ռեջեփ Թայիփ Էրդողանը հայտարարել էր, որ եթե ահաբեկչական խմբավորումը հարձակում գործի Սուլեյման շահի դամբարանի վրա, որի պահպանությունը կատարում է 25 թուրք զինվորներից բաղկացած անձնակազմը, Անկարան կպատասխանի ռազմական գործողություններով: Թուրքական ԶԼՄ-ներն անգամ հայտնել են, որ Թուրքիան համապատասխան զինվորական ստորաբաժանումներ է մոտեցնում իր սահմանից մոտ 30 կմ հեռավորության վրա գտնվող այդ տարածք:

«Թարաֆ»-ին հասած հավաստի տեղեկություններով, դամբարանը դատարկելու համար ԻԼԻՊ-ը Թուրքիային երեք շաբաթ ժամանակ է տվել: Թերթի համաձայն, իշխող «Արդարություն և զարգացում» կուսակցության կառավարությունը զինված ուժերի գլխավոր շտաբին արդեն հանձնարարել է դատարկել դամբարանը:

Օսմանյան պետության հիմնադիր Օսման Գազիի պապ Սուլեյման շահի և երկու թուրք զինվորի գերեզմանների գտնվելու վայրը Սիրիայում Լոզանի պայմանագրով համարվում է Թուրքիային պատկանող հողատարածք, որը մինչ այժմ պահպանվում է թուրք զինվորների կողմից:

Թուրքիայի արտաքին գործերի նախարարությունը «Թարաֆ»-ի այդ հաղորդագրությունը «անհիմն» և «անպատասխանատու» է բնութագրել: