Ադրբեջանի իրավապաշտպանը թաքնվել է արտասահմանյան դեսպանատանը

Միջազգային հայ-ադրբեջանական շփումների ադրբեջանցի մասնակից Ռասուլ Մուրսալովը Ադրբեջանի իշխանությունների ճնշումներից փրկվելու համար թաքնվել է արևմտյան դեսպանատանը:

Այս մասին, ինչպես հաղորդում է «Արմենպրես»-ը, իրավապաշտպանն անձամբ հայտնել է ադրբեջանական «Ենի Մուսավաթ» թերթին:

Ադրբեջանի ժողովրդական ճակատ կուսակցության անդամ Ռասուլ Մուրսալովի նկատմամբ հայրենիքի դավաճանության և խարդախության հոդվածներով քրեական գործեր են բացվել:

Հայրենիքի դավաճանության հոդվածով քրեական գործը Ռասուլ Մուրսալովի դեմ բացվել է միջազգային ծրագրերի շրջանակում Վրաստանում օգոստոսի 1-4-ին հայ իրավապաշտպանների հետ հանդիպում ունենալու պատճառով: Երկրորդ քրեական գործը նրա դեմ հարուցվել է ադրբեջանական բանկերից մեկում 2008 թվականին վերցրած վարկը, իբր, չմարելու համար:

«Իմ դեմ քրեական գործ են հարուցել «պետական դավաճանության» մեղադրանքով: Որպես հիմնավորում նրանք նշում են միջազգային շրջանակում հայերի հետ իմ հանդիպումները, որոնք տեղի են ունեցել օգոստոսի 1-4-ին Վրաստանում: Այնտեղ հայերի հետ մենք քննարկել ենք ղարաբաղյան հակամարտության խաղաղ լուծման ուղիները»,-թերթին ասել է Մուրսալովը:

Իրավապաշտպանն ասել է, որ Ադրբեջան վերադառնալու դեպքում իրեն ցմահ ազատազրկում է սպասում:

«Անվտանգության նկատառումներով ես չեմ կարող բացահայտել իմ գտնվելու վայրը: Ես թաքնվել եմ արտասահմանյան դեսպանատներից մեկում: Հնարավոր է, որ տեղափոխվեմ Եվրոպա», -նշել է Մուրսալովը:

«Ժողովրդական դիվանագիտության» միջազգային նախագծերի շրջանակում հայերի հետ շփումներ ունենալու համար Ադրբեջանում ձերբակալվել են լրագրող Ռաուֆ Միրկադիրովը, Լեյլա և Արիֆ Յունուսները և շատ ուրիշներ, մի քանի իրավապաշտպանների էլ հաջողվել է փախչել արտասահման: