Ադրբեջանում շատանում են քաղբանտարկյալների ցուցակի գաղափարը պաշտպանողները

«Ադրբեջանն առանց քաղբանտարկյալների» հասարակական դաշնությունը հանդես է եկել քաղբանտարկյալների միասնական ցուցակ կազմելու օգտին հայտարարությամբ:

Ինչպես հաղորդում է «Արմենպրես»-ը՝վկայակոչելով «Թուրան» լրատվական գործակալությունը, հայտարարության հեղինակների կարծիքով՝ ցուցակն անդրադարձնում է իրական պատկերը և այն պատրաստվել է ԵԽԽՎ-ի 2012 թվականի հոկտեմբերի 3-ի թիվ 1900 բանաձևում արծարծված չափանիշների հիման վրա: Այդ ցուցակում ընդգրկված են 98 քաղաքական բանտարկյալներ և խղճի դատապարտյալներ:

«Ցավոք Ադրբեջանը քաղբանտարկյալների և խղճի դատապարտյալների թվով վերածվում է աշխարհում ամենաավտորաիտար երկրներից մեկի», -ասվում է հայտարարության մեջ:

Դաշնությունը շարունակում է քիչ հայտնի քաղբանտարկյալների քրեական գործերի մասին տեղեկատավության հավաքագրման աշխատանքները: Ավելի ուշ այդ աշխատանքը ներկայացվելու է քաղբանտարկյալների միասնական ցուցակը պատրաստող Աշխատանքային խմբին:

Դաշնությունը Ադրբեջանի իշխանությանը նաև կոչ է արել շտապ ազատել քաղբանտարկյալներին և պահանջել վերջ դնել քաղաքացիական ակտիվիստների դեմ բռնաճնշումներին:

Ադրբեջանի իշխանությունները հայտարարում են, որ երկրում քաղաքական դրդապատճառներով բանտարկյալներ չկան, և որ նրանք բոլորը ձերբակալվել և դատապարտվել են կատարած քրեական հանցագործությունների համար: