Նախիջևանում մահացու ծեծի են ենթարկել իրավապաշտպանին

Նախիջևանում գազանաբար ծեծել են «Աջակցություն ժողովրդավարության ռեսուրսային զարգացման կենտրոնի» աշխատակից, ճանաչված իրավապաշտպան Իլգար Նասիբովին: Մի խումբ անհայտ անձինք փողոցում հարձակվել են Իլգար Նասիբովի վրա, մահացու ծեծի ենթարկել նրան և նետել կենտրոնի գրասենյակ: Այս մասին, ինչպես հաղորդում է «Արմենպրես»-ը, հայտնում է «Ազադլըգ» թերթը:

Ծանր հարվածներից ուշաթափված Իլգար Նասիբովը չի հիշում իրեն ծեծողներին: Նրա կինը' նույնպես իրավապաշտպան Մալահաթ Նասիբովան, հայտնել է, որ Ադրբեջանի ազգային անվտանգության նախարարության աշխատակիցները բազմիցս սպառնացել են իրենց:

Մալահաթ Նասիբովան Meydan TV-ին հայտնել է, որ միջադեպը տեղի է ունեցել օգոստոսի 21-ին մոտ ժամը 21-ին:

«Ամուսնուս վիճակը սարսափելի վատ է: Նրան մահացու ծեծի են ենթարկել: Մենք նրան հայտնաբերել ենք գրասենյակում անճանաչելի դարձած: Նա շատ արյուն է կորցրել: Հարվածել են գլխին, ուշաթափ արել և վնասվածքներ հասցրել մարմնի բոլոր մասերին: Գրասենյակի բանալին վերցրել են գրպանից: Նա այժմ ոչինչ չի հիշում, միայն ասում է, որ իր վրա մեծ խումբ է հարձակվել: Նրան ծեծել են նաև գրասենյակում»,- ասել է Նասիբովան:

Նա նաև հայտնել է, որ մոտ 1,5 ամիս առաջ անհայտ անձն ավտոմեքենայով վրաերթի է ենթարկել Իլգար Նասիբովին և վնասվածքներ պատճառել:

«Ես կասկածում եմ Նախիջևանի ազգային անվտանգության նախարարության վրա: Նախարարության աշխատակիցները բազմիցս սպառնացել են մեզ: Դա անում են մեր լրագրողական գործունեության պատճառով»,- ասել է նա:

Ադրբեջանական ԶԼՄ-ները հայտնել էին, որ օգոստոսի 6-ին անհայտ անձինք փորձել են ներխուժել Նասիբովների բնակարան: Նրանք փորձել են ջարդել բնակարանի դռան կողպեքը, բայց չեն կարողացել: Մալահաթ Նասիբովան նշել է, որ այդ միջադեպի համար ևս կասկածում է անվտանգության աշխատակիցներին:

Մալահաթ Նասիբովան Նախիջևանում «Աջակցություն ժողովրդավարությանը ռեսուրսային կենտրոնի» ղեկավարն է: Իլգար Նասիբովն այդ կենտրոնի աշխատակից է և համագործակցում է մի շարք ԶԼՄ-ների հետ:

Նասիբովները տեղի իշխանությանը քննադատելու և քաղաքացիական իրավունքները պաշտպանելու համար նախկինում ևս նման ճնշումների են ենթարկվել: Մալահաթ Նասիբովան Ռաֆտոյի անվան հեղինակավոր միջազգային պարգևի (Նորվեգիա) դափնեկիր է: