Աբխազիայում նախագահական ընտրությունների քվեարկությունն ավարտվեց

Այսօր Աբխազիայում անցկացվեց արտահերթ նախագահական ընտրություններ: Թեկնածուները չորսն էին` անվտանգության ծառայության պետ Ասլան Բժանիան, Ներքին գործերի նախկին նախարար Լեոնիդ Ձապշբան, պաշտպանության նախարար Միրաբ Քիշմարիան և ընդդիմության առաջնորդ պատգամավոր Ռաուլ Խաջիմբան: Ավելի քան մեկ ամիս նրանք ներկայացրել են իրենց նախընտրական ծրագիրն ու հանդիպումներ ունեցել բնակչության հետ:

ԿԸՀ տվյալների համաձայն, տեղի ժամանակով, ժամը 18:00-ի դրությամբ ընտրություններին մասնակցել էր ընտրողների ավելի քան 55.84%-ը:

ԿԸՀ նախագահ Բատալ Տաբագուան հայտնել է, որ Աբխազիայի նախագահի ընտրությունները կայացած են համարվում:

Քվեարկությունն ավարտվել է տեղական ժամանակով ժամը 20:00-ին, որից հետո հանձնաժողովի անդամներն անցել են ձայների հաշվարկմանը:

Նշենք, որ ավելի վաղ Աբխազիայի կենտրոնական ընտրական հանձնաժողովը դրական է գնահատել քարոզարշավի ընթացքը` փաստելով, որ օրենքի լուրջ խախտումներ տեղի չեն ունեցել: Մինչ նախագահական ընտրությունը Աբխազիայի նախագահի 4 թեկնածուները ստորագրել են համաձայնագիր երկրի քաղաքական համակարգի բարեփոխման համար:

Համաձայնագրի ստորագրման նախաձեռնողը նախագահի պարտականություններն իրականացնող Վալերի Բգանբան է: Նրա խոսքով` այս համաձայնագրի նպատակն է ապահովել կայունություն, միավորել հասարակությունն ու ստեղծել պայմաններ քաղաքական և սոցիալ-տնտեսական ոլորտներում բարեփոխումներ կատարելու համար:

Համաձայնագիրը ենթադրում է, որ նախագահական ընտրություններից հետո կառավարությունը կձևավորվի կոալիցիայի սկզբունքով և նախապատվություն կտրվի տարբեր քաղաքական կուսակցությունների ներկայացուցիչներին: Ընտրություններից հետո կկայանան քննարկումներ, որոնց նպատակն է լինելու սահմանադրական բարեփոխումների ձևաչափի մշակումը: Ձևաչափը կենթադրի իշխանության լիազորությունների վերաբաշխումը: Սահմանադրական բարեփոխումներ նախատեսվում է իրականացնել նախագահական ընտրություններից հետո մեկ տարվա ընթացքում: