Ռուսաստանի հետ պատժամիջոցների լեզվով խոսելու փորձերն անընդունելի են. Լավրով

Ռուսաստանը չի ցանկանում ընթանալ լարվածության էսկալացման ուղիով և հուսով է, որ ԱՄՆ-ն, Եվրամիությունը և մյուս երկրները կլսեն բանականության ձայնը և կդադարեն նրա հետ վերջնագրերի լեզվով խոսելուց:

Այս մասին հայտարարել է ՌԴ-ի արտաքին գործերի նախարարության ղեկավար Սերգեյ Լավրովը՝ պատասխանելով բրիտանական The Daily Telegraph հրատարակության Russia beyond the headlines հավելվածի հարցերին, տեղեկացնում է «Արմենպրես»-ը:

«Ճգնաժամային իրավիճակները միակողմանի պատժամիջոցների ուղիով լուծելու փորձերը, պատժամիջոցներ, որոնք դուրս են ՄԱԿ-ի Անվտանգության խորհրդի որոշումների շրջանակներից, սպառնում են միջազգային խաղաղությանը և կայունությանը,- նշել է նախարարը:- Այդ փորձերն անարդյունավետ են և հակասում են միջազգային իրավունքի նորմաներին և սկզբունքներին»:

«Ռուսաստանի հետ, ի դեպ ասած նաև ցանկացած այլ երկրի հետ վերջնագրերի և հարկադրական միջոցների լեզվով խոսելը բացարձակապես անընդունելի է,- ընդգծել է Լավրովը:- Մեր պատասխանը Միացյալ Նահանգների, Եվրամիության և որոշ այլ երկրների միակողմանի քայլերին հավասարակշռված է և հաշվի է առնում միջազգային պայմանագրերի գծով Ռուսաստանի իրավունքներն ու պարտավորությունները, այդ թվում Առևտրի համաշխարհային կազմակերպության շրջանակներում», հաղորդել է ԻՏԱՌ-ՏԱՍՍ-ը: