Հունաստանի խորհրդարանում ցեղասպանության ժխտումը քրեականացնող օրինագծի քննարկումը հետաձգվել է մեկ շաբաթով

Հունաստանի խորհրդարանը հետաձգել է Ցեղասպանության ժխտումը քրեականացնող օրինագծի քննարկման հարցը: Հունաստանի արդարադատության նախարար Հարալամբոս Աթանասիունի նախաձեռնությամբ օրինագծի քննարկումը դուրս է եկել խորհրդարանի այս շաբաթվա օրակարգից՝ պատճառաբանությամբ, որ կան տեխնիկական որոշ խնդիրներ, որոնք հարթելուց հետո միայն հնարավոր կլինի օրինագիծը ներկայացնել խորհրդարանականների դատին:

«Արմենպրես»-ի հետ զրույցում Հունաստանում տպագրվող «Ազատ օր» պարբերականի գլխավոր խմբագիր Հռիփսիմե Հարությունյանը նշում է, որ ամենայն հավանականությամբ օրինագիծը կդրվի քննարկման մեկ շաբաթից: Մինչ այդ, այսօր նախատեսված է Հունաստանի վարչապետի ու փոխվարչապետի հանդիպումը, ովքեր պետք է քննարկեն օրինագիծն ու փորձեն հասկանալ տարակարծությունների պատճառը, մեղմեն դրանք ու օրինագծի շտկված տարբերակը ներկայացնեն խորհրդարանի քննարկմանը:

Հռիփսիմե Հարությունյանի փոխանցմամբ, այս հարցում շատ ակտիվ է նաև տեղի հայ համայնքը: Դեռևս օրինագծի ներկայացումից 7 ամիս առաջ համայնքի ներկայացուցիչները բազմաթիվ հանդիպումներ են ունեցել խորհրդարանում ընդգրկված բոլոր քաղաքական ուժերի ներկայացուցիչների հետ, անցկացրել քննարկումներ: «Բազմաթիվ խորհրդարանականներ դրական վերաբերմունք ունեն և կարծում են, որ ինչպես հրեական ցեղասպանության, այնպես էլ հայերի և Պոնտոսի հույների ցեղասպանության ժխտումը պետք է քրեականացվի: Վերջին պահին արդարադատության նախարարն օրինագծի քննարկումը հետաձգեց՝ պատճառաբանությամբ, որ խոսքի ազատության և սահմանափակման առնչությամբ հնչել են որոշ տարակարծություններ և այդ խոչընդոտներից հետո միայն օրինագիծը կքննարկվի»,- ասաց Հարությունյանը՝ հավելելով, որ հայ համայնքը լուրջ աշխատանք է կատարում՝ հենվելով այն փաստի վրա, որ Հունաստանի խորհրդարանը 1996թ. ճանաչել և դատապարտել է 1915թ. Հայոց ցեղասպանությունն ու այն ընդունել հիշատակի օր:

«Յուրաքանչյուր տարի ապրիլի 24-ին Հունաստանի կառավարության նախաձեռնությամբ երկրի երեք մեծ քաղաքներում կազմակերպվում են հիշատակի ոգեկոչման արարողություններ: Հետևաբար, այս ամենը հաշվի առնելով, պետք է նաև քրեականացվի ցեղասպանության ժխտումը, ինչպես դա արվում է Հոլոքոսթի պարագայում»,- ասաց Հռիփսիմե Հարությունյանը՝ հավելելով, որ համայնքում լիահույս են, որ արդարությունն ու բարոյականությունը պետք է հաղթանակեն, և մեկ շաբաթից խորհրդարանականները պետք է ընդունեն օրինագիծը: Հարությունյանի խոսքով, համայնքում ուշադրությամբ հետևում են բոլոր զարգացումներին և անմիջապես արձագանքում:

Օգոստոսի 22-ին Հունաստանի խորհրդարանի օրակարգ էր բերվել ցեղասպանության հերքումը քրեականացնող օրենքի նախագիծը: Հունաստանի արդարադատության նախարար Հարալամբոս Աթանասիուն հայտարարել էր, որ «Այլատյացության դեմ» օրենքում ավելացվել է Պոնտոսի հույների, հայերի և Փոքր Ասիայի ցեղասպանությունների հերքումը քրեականացնելու վերաբերյալ հոդված:

«Օրինագծի վերջնական տարբերակի համաձայն, Հունաստանի խորհրդարանի կողմից ճանաչված ցեղասպանությունների հերքումը հանցագործություն կհամարվի: Բացի այդ, կքրեականացվի նաև հունական և միջազգային դատարանների վճիռներով ընդունված ցեղասպանությունների հերքումը», -ասել է հույն նախարարը:

Օրինագիծը Հունաստանի խորհրդարանում պետք է քննարկվեր օգոստոսի 26-27-ին տեղի ունենալիք նիստում: