Վենետիկում բացվում և 71-րդ Միջազգային կինոփառատոնը

Մեքսիկացի ռեժիսոր Ալեխանդրո Գոնսալես Ինյարիտուի «Բյորդմեն» (Birdman) ֆիլմի պրեմիերայով Վենետիկում կբացվի 71-րդ Միջազգային կինոփառատոնը կամ, ինչպես այն պաշտոնապես անվանում են՝ Կինոարվեստի միջազգային ցուցահանդեսը: Կինոյի աշխարհում հնագույն ստուգատեսն ըստ ավանդույթի տեղի է ունենում Վենետիկի ծովալճակի Լիդո կղզու Կինոյի պալատում, տեղեկացնում է «Արմենպրես»-ը:

Կարմիր ուղեգորգի վրա սպասում են «Բյորդմենում» խաղացած Մայքլ Քիթոնին, Էդվարդ Նորթոնին և Էմմա Սթոունին: Նրանք կտան ստեղծագործական մրցության մեկնարկը, որտեղ գլխավոր պարգևների՝ «Սուրբ Մարկոսի ոսկե» և «Արծաթե առյուծների», ինչպես նաև ժյուրիի Մեծ մրցանակի համար կպայքարեն 20 ֆիլմեր տարբեր երկրներից, այդ թվում ԱՄՆ-ից, Իրանից, Ֆրանսիայից, Իտալիայից, Թուրքիայից, Ճապոնիայից և Չինաստանից:

Այս տարի Լիդոյում ամենասպասվող անուններից է Ալ Պաչինոն, որը խաղացել է միանգամից երկու կինոնկարներում՝ Դևիդ Գորդոն Գրինի մրցութային «Մանգլհոռն»-ում (Manglehorn) և Բարի Լևինսոնի «Նվաստացում» (The Humbling) արտամրցութային ֆիլմում: Տասը տարվա բացակայությունից հետո Լիդո է վերադառնում Լարս ֆոն Թրիերը: Նա մրցույթից դուրս կցուցադրի իր աղմկահարույց և բանավեճի դրդող «Հեշտամոլ կնոջ» (Nymphomaniac Volume II) երկրորդ մասը՝ 3-ժամյա ռեժիսորական տարբերկով:

Հիմնական մրցույթի ժյուրիի նախագահն է դարձել ֆրանսիացի կոմպոզտոր Ալեքսանդր Դեպլան՝ մրցանակների արժանացած այնպիսի կինոժապավենների երաժշտության հեղինակը, ինչպիսիք են «Թագավո՛րն է խոսում»(The King's Speach), «Կենաց ծառը» (The Tree of Life), «Թագուհին» (The Queen), ինչպես նաև Հարի Փոթերի մասին ֆիլմերը: Ստուգատեսի հաղթողները կհայտարարվեն սեպտեմբերի 6-ին, հաղորդել է ԻՏԱՌ-ՏԱՍՍ-ը: