ԱՄՆ պետքարտուղարությունը դատապարտել է Ադրբեջանում իրավապաշտպանի գազանային ծեծը

ԱՄՆ-ի պետքարտուղարության մամուլի քարտուղար Ջեն Փսակին հանդես է եկել Ադրբեջանում իրավապաշտպան և լրագրող Իլգար Նասիբովին գազանային ծեծի ենթարկելու առնչությամբ հայտարարությամբ:

Ինչպես հաղորդում է «Արմենպրես»-ը, հայտարարության մեջ ասվում է. «Մենք դատապարտում ենք Նախիջևանում հայտնի քաղաքացիական ակտիվիստ, «Դեմոկրատիայի պաշտպանության կենտրոն» ոչ կառավարական կազմակերպության աշխատակից Իլգար Նասիբովին ծեծի ենթարկելու դեպքը, ով ծանր վիճակում հոսպիտալացվել է: Մենք հանդես ենք գալիս արագ, ամբողջական և թափանցիկ հետաքննություն անցկացնելու և հարձակվողներին քրեական պատասխանատվության ենթարկելու օգտին: Մենք Ադրբեջանի կառավարությանը կոչ ենք անում ձեռնարկել անհապաղ քայլեր' արտահայտվելու, հավաքների և միավորումների հիմնարար ազատությունները պաշտպանելու համար»:

Նախիջևանում մի խումբ անհայտ անձինք օգոստոսի 21-ին մոտ ժամը 21-ին փողոցում հարձակվել են Իլգար Նասիբովի վրա, մահացու ծեծի ենթարկել նրան և նետել» Դեմոկրատիայի պաշտպանության կենտրոն» գրասենյակ' ջարդելով այնտեղ ամեն ինչ: Նասիբովը կորցրել է հիշողությունը և ներկայումս գտնվում է Նախիջևանի հիվանդանոցի վերակենդանացման բաժանմունքում:

«Ես կակածում եմ Նախիջևանի ազգային անվտանգության նախարարության վրա: Նախարարության աշխատակիցները բազմիցս սպառնացել են մեզ: Դա անում են մեր լրագրողական գործունեության պատճառով»,- ադրբեջանական Meydan TV հեռուստաալիքին հայտնել է Նասիբովի կինը' Մալահաթ Նասիբովան, ով Նախիջևանում «Աջակցություն ժողովրդավարությանը ռեսուրսային կենտրոնի» ղեկավարն է:

Նա նաև հայտնել է, որ մոտ 1,5 ամիս առաջ անհայտ անձն ավտոմեքենան քշել է Իլգար Նասիբովի վրա և վնասվածքներ պատճառել:

Ադրբեջանական ԶԼՄ-ները հայտնել էին, որ օգոստոսի 6-ին անհայտ անձինք փորձել են ներխուժել Նասիբովների բնակարան: Նրանք փորձել են ջարդել բնակարանի դռան կողպեքը, բայց չեն կարողացել: Մալահաթ Նասիբովան նշել է, որ այդ միջադեպի համար ևս կասկածում է անվտանգության աշխատակիցներին:

Նասիբովները տեղի իշխանությանը քննադատելու և քաղաքացիական իրավունքները պաշտպանելու համար նախկինում ևս նման ճնշումների են ենթարկվել: Մալահաթ Նասիբովան Ռաֆտոյի անվան հեղինակավոր միջազգային պարգևի (Նորվեգիա) դափնեկիր է:

Նախիջևանի իրավապահ մարմինները հրաժարվում են քրեական գործ հարուցել իրավապաշտպանի գազանային ծեծի ենթարկվելու փաստով:

Ադրբեջանցի իրավապաշտպանին մահացու ծեծի ենթարկելու փաստը դատապարտել են նաև «Մարդու իրավունքների տների հիմնադրամ» միջազգային իրավապաշտպան կազմակերպությունը, Նորվեգական Հելսինկյան կոմիտեն, Ռաֆտո հիմնադրամը, Front Line Defenders, People in Need, Human Rights Watch, ARTICLE 19 և «Լրագրողներն առանց սահմանների» կազմակերպությունները: Համատեղ արված հայտարարության մեջ միջազգային իրավապաշտպան կազմակերպություններն Ադրբեջանի իշխանություններին կոչ են արել անհապաղ դադարեցնել քաղաքացիական հասարակության վրա ճնշումները: