Աբխազիայի նախագահը Ռուսաստանին գլխավոր դերակատարն է համարում տարածաշրջանի անվտանգության ապահովման գործում

Աբխազիայի նորընտիր նախագահ Ռաուլ Խաջիմբան, որը հաղթանակ է տարել օգոստոսի 24-ին հանրապետությունում կայացած վաղաժամկետ նախագահական ընտրություններում, ԻՏԱՌ-ՏԱՍՍ-ին տված հարցազրույցում հայտարարել է, որ Վրաստանից առայժմ ոչ մի կոնկրետ առաջարկ չի ստացվել Աբխազիայի հետ ուղղակի երկխոսություն սկսելու մասին, տեղեկացնում է «Արմենպրես»-ը:

«Այսօրվա դրությամբ կա միայն «Ժնևի հարթակը», որտեղ քննարկվում են երկու կողմերի համար կարևոր հարցերը,- նշել է Աբխազիայի ղեկավարը:- Մեզ անվտանգության երաշխիքներ են հարկավոր, որոնք, ցավոք, առայժմ չկան»: «Ցանկալի կլիներ, որ Վրաստանը վերջապես գիտակցեր, որ առկա է Աբխազիայի՝ որպես անկախ պետության գոյության իրական փաստը,- ընդգծել է նա:-Վրաստանը պետք է ճանաչի այդ փաստը, ստորագրի ուժի չկիրառման համաձայնագիր, և այդժամ մեր հարաբերությունների հետագա զարգացումը կընթանա ավելի դրական հունով: Մենք հասկանում ենք, որ Վրաստանի հետ հարևաններ ենք և հարկադրված ենք ապրել կողք-կողքի ու կառուցել որոշակի հարաբերություններ, որոնք թույլ կտան նվազագույնի հասցնել արտաքին վտանգներն ու սպառնալիքները»:

Խաջիմբան համոզված է, որ այդ նպատակն իրագործելու հարցում գլխավոր դերը պատկանում է Ռուսաստանին, որը երկար տարիներ տարածաշրջանում խաղաղություն ու անվտանգություն է ապահովում իր խաղաղապահների ներկայության շնորհիվ: