Հրապարակվել է Էրդողանի ունեցվածքի չափը

Թուրքիայի Resmi Gazete պաշտոնաթերթում հրապարկվել է 12-րդ նախագահ ընտրված Ռեջեփ Թայիփ Էրդողանի ունեցվածքի չափը: Ինչպես հաղորդում է «Արմենպրես»-ը, այս մասին տեղեկացնում է թուրքական «Հուրիեթ» պարբերականը:

Հրապարակված հայտարարագրի համաձայն` Էրդողանը Գյունեյսու-Դումանքայա գյուղում ունի 2000 քառակուսի մետր տարածք` արժողությունը` 10 հազար թուրքական լիրա (մոտ 6 հազար ԱՄՆ դոլար): Թուրքիայի նորընտիր նախագահի ունեցվածքի մեջ է մտնում 234 հազար թուրքական լիրա (շուրջ 109 հազար ԱՄՆ դոլար) արժողությամբ 2011 թվականի արտադրության AUDI A8 մակնիշի ավտոմեքենա: Հայտարարագրում նշված է նաև թուրքական լիրայով և ԱՄՆ դոլարով Էրդողանի բանկային հաշիվների մնացորդը: (Նախորդ հայտարարագրում դա հետևյալն էր. 3 միլիոն 390 հազար 384 թուրքական լիրա (մոտ 2 միլիոն դոլար), 25 հազար ֆուն տ ստերլինգ, 199 հազար 867 ԱՄՆ դոլար):

Էրդողանի ունեցվածքի վերաբերյալ նախկինում հրապարակած հայտարարագրում նշվում էր նաև, որ նա ունի 500 հազար թուրքական լիրա (ավելի քան 283 հազար ԱՄՆ դոլար) ստանալիք: Այս անգամ հայտնի է դարձել, որ այդ գումարն Էրդողանին պարտք է իր ավագ որդին` Ահմեդ Բուրաք Էրդողանը: