Յացենյուկն ու Տուրչինովը նոր կուսակցություն են ստեղծում խորհրդարանի վաղաժամկետ ընտրություններին մասնակցելու համար

Ուկրաինայի վարչապետ Արսենի Յացենյուկը և հանրապետության խորհրդարանի նախագահ Ալեքսանդր Տուրչինովն նոր քաղաքական նախագիծ են ստեղծում վաղաժամկետ խորհրդարանական ընտրություններին մասնակցելու համար: Այս մասին, ինչպես տեղեկացնում է «Արմենպրես»-ը, հաղորդել է ուկրաինական «Կապիտալ» թերթը:

Ըստ հրատարակության տեղեկատվության՝ «Բատկիվշչինա» խմբակցության մի շարք պատգամավորներ ներկայում մշակում են նոր կուսակցության ստեղծման տարբերակը, որով իրենց թեկնածությունները քվեարկության կդնեն Ռադայի ընտրություններում: Այսպես, գործընթացը ղեկավարում է Տուրչինովը, իսկ նոր քաղաքական ուժը կարող է գլխավորել Յացենյուկը: «Նախ նրանք բանակցություններ են վարել Պորոշենկոյի հետ, բայց ոչինչ չի ստացվել, այժմ զբաղվում են իրենց կուսակցության ստեղծմամբ արդեն գոյություն ունեցող կուսակցություններից մեկի հիման վրա»,- ասել է ժողովրդական պատգամավոր Անդրեյ Սենչենկոն «Բատկիվշչինա»-ից:

Սենչենկոն նոր կուսակցության ստեղծման հետ է կապում սկանդալը «Բատկիվշչինայի» քաղխորհրդի վերջին նիստում: Այն ժամանակ խմբակցության մի քանի պատգամավորներ՝ Տուրչինովի գլխավորությամբ, հեռացել են նիստից՝ քաղաքական դաշնակիցների հետ կոալիցիոն համաձայնության և ընտրական ցուցակում Յացենյուկի առաջին տեղի հարցերը քննարկման ներկայացնելուց Յուլյա Տիմոշենկոյի հրաժարվելու պատճառով:

Ինչպես ավելի վաղ նշել է ԻՏԱՌ-ՏԱՍՍ-ը, Արսեն Ավագովն օգոստոսի 27-ին Facebook սոցիալական ցանցի իր էջում հաղորդագրություն է զետեղել «Բատկիվշչինա»-ից կուսակցության ավելի քան տասն անդամների դուրս գալու մասին, որոնց թվում նախարարներ կան ներկայիս կառավարությունից: