Մոսկվան ԵԱՀԿ-ի նիստում հայտարարել Է, որ Ուկրաինայում ռուս զինվորականներ չկան

ԵԱՀԿ-ին առընթեր ՌԴ-ի մշտական ներկայացուցիչ Անդրեյ Կելինը ժխտել է ուկրաինական կողմի այն մեղադրանքները, թե Ուկրաինայի տարածք են մտել ռուսական զորասյուներ, տեղեկացնում է «Արմենպրես»-ը:

«Ոչ մի ռուսական զորասյուն էլ չկա»,- ՌԻԱ Նովոստիին ասել է Կելինը ԵԱՀԿ-ի մշտական խորհրդի՝ օգոստոսի 28-ին գումարված հատուկ նիստից հետո:

«Նիստում մեր գործընկերներին հետաքրքրում էր ոչ թե Ուկրաինայի հարավ-արևելքի հումանիտար իրադրությունը, այլ ռուսական մարտական տեխնիկայի մտացածին զորասյուները, որոնք իբր այժմ շարժվում են դեպի Նովոազովսկ: Այդ մասին խոսել է միայն Ուկրաինայի մշտական ներկայացուցիչը: Ուրիշ ոչ մեկը նման տեղեկություններ չունի: Ոչ մի զորասյուն էլ, իհարկե, չկա»,- հավելել է Կելինը:

Ավելի վաղ, Ուկրաինայի նախագահ Պյոտր Պորոշենկոն Դոնեցկի մարզում իրադրության սրվելու կապակցությամբ չեղյալ է հայտարարել աշխատանքային այցը Թուրքիա և հանրապետության Ազգային անվտանգության և հայտնել է, որ պաշտպանության խորհրդի շտապ նիստ է գումարում: «Դոնեցկի մարզում իրադրության կտրուկ սրվելու կապակցությամբ ես որոշում եմ ընդունել չեղյալ է հայտարարել աշխատանքային այցը Թուրքիայի Հանրապետություն, քանի որ ռուսական զորք է մտցվել Ուկրաինա»,- հայտարարել է Պորոշենկոն:

Նախագահի մամուլի ծառայության հաղորդագրության մեջ նաև ասված է, որ Ուկրաինան ՄԱԿ-ի Անվտանգության խորհրդի նիստի շտապ գումարում է նախաձեռնում: Բացի այդ, նրա խոսքով, Ուկրաինան կդիմի եվրոպական գործընկերներին՝ կոչ անելով հրավիրել Եվրամիության խորհրդի արտակարգ նիստ:

«Աշխարհը պետք է գնահատական տա Ուկրաինայում իրադրության կտրուկ սրվելուն»,- ասել է Պորոշենկոն: