«ՀԱՊԿ-ի խաղաղապահները պատրաստ են մասնակցելու խաղաղարար առաքելությանն Ուկրաինայում». Բորդյուժա

ՀԱՊԿ-ի խաղաղապահ ուժերը պատրաստ են բոլոր բարդ գործողություններին, այդ թվում՝ մասնակից երկրների տարածքից դուրս, ներառյալ Ուկրաինան, բայց դրանց օգտագործման վերաբերյալ որոշման ընդունումը Հավաքական անվտանգության խորհրդի իրավասությունն է, որի մեջ մտնում են անդամ երկրների ղեկավարները: Այդ մասին, ինչպես տեղեկացնում է «Արմենպրես»-ը, օգոստոսի 29-ին ՌԻԱ Նովոստիին հայտարարել է ՀԱՊԿ-ի գլխավոր քարտուղար Նիկոլայ Բորդյու ժան:

«ՀԱՊԿ-ի խաղաղապահ ուժերը կազմավորվել են մի քանի տարի առաջ և մարտական պատրաստություն անցել: Դրանց կազմի մեջ մտնող զինծառայողները լավ պատրաստված են անհատական առումով, հանդերձված անհրաժեշտ բոլոր զենքերով ու տեխնիկական միջոցներով: Խաղաղապահ խնդիրներ լուծելու, այդ թվում՝ հավաքական ուժերի կազմում, նրանց ընդունակությունը բարձր մակարդակի վրա է: Կարելի է արձանագրել, որ նրանք պատրաստ են մասնակցել ցանկացած բարդության խաղաղապահ գործողությունների, ինչը մեկ անգամ ևս հաստատվեց Ղրղզստանի Հանրապետության տարածքում վերջերս անցկացված համատեղ վարժանքների արդյունքներով»,-ասել է Բորդյուժան՝ պատասխանելով ՀԱՊԿ-ի խաղաղապահներին օգտագործելու հնարավորության վերաբերյալ հարցին, որպեսզի վերջ դրվի Ուկրաինայի արևելքում ծավալված հակամարտության պատճառով մարդկանց զոհվելուն:

«ՀԱՊԿ-ի խաղաղապահ ուժերի կիրառման հնարավորությունը կազմակերպության Հավաքական անվտանգության խորհրդի՝ ՀԱՊԿ-ի բարձրագույն մարմնի իրավասությունն է, մարմին, որը բաղկացած է անդամ պետությունների ղեկավարներից: Նրանց համատեղ որոշմամբ, գոյություն ունեցող համաձայնագրերին համապատասխան, խաղաղապահ ուժերը կարող են ծավալվել ինչպես անդամ պետությունների տարածքում, այնպես էլ նրանց սահմաններից դուրս»,-հիշեցրել է Բորդյուժան: