Ադրբեջանն ԱՄՆ-ի դատապարտմանը պատասխանում է լրագրողների նոր ձերբակալություններով

Ադրբեջանում մարդու իրավունքների աղետալի վիճակի հետ կապված ԱՄՆ պետքարտուղարության կողմից երեկ արված դատապարտող հայտարարությանը պաշտոնական Բաքուն պատասխանել է իրավապաշտպանների և լրագրողների նոր ձերբակալություններով:

Ինչպես հաղորդում է «Արմենպրես»-ը' վկայակոչելով ադրբեջանական ԶԼՄ-ները, Բաքվի Ապշերոնի շրջանի ոստիկանության աշխատակիցները այսօր ձերբակալել են հայտնի ընդդիմադիր լրագրող Սեյմուր Հազիին: Այս մասին ադրբեջանական ԶԼՄ-ներին հայտնել է «Ժողովրդական ճակատ» կուսակցության մամուլի ծառայության ղեկավար Նաթիկ Ադիլովը:

Սեյմուր Հազին ներկայիս իշխանություններին սուր քննադատող ընդդիմադիր «Ազադլըգ» թերթի աշխատակից է: Նրա ձերբակալության պատճառները հայտնի չեն:

Ադրբեջանական «Ենի Մուսավաթ» թերթն էլ հայտնում է, որ այսօր Բաքվի դատախազությունում 6 ժամ հարցաքննության է ենթարկվել «Տնտեսական հետազոտությունների կենտրոնի» ղեկավար, «Ենի Մուսավաթ» կուսակցության նախագահի պաշտոնի թեկնածու Գուբադ Իբադօղլուն, ով հայտնի է որպես Ադրբեջանի իշխանությունների կողմից հորջորջվող' «աշխարհում նմանը չունեցող զարգացում ունեցող» երկրի տնտեսության խիստ քննադատ:

Վերջին 10 օրում Ադրբեջանի իշխանությունները կալանավորել կամ դաժան ծեծի են ենթարկել 6-ից ավելի իրավապաշտպանների և հասարակական ակտիվիստների:

ԱՄՆ պետքարտուղարության մամուլի քարտուղար Ջեն Փսակին դատապարտել էր իրավապաշտպան և լրագրող Իլգար Նասիբովին Նախիջևանում մահացու ծեծի ենթարկելու փաստը և ադրբեջանական իշխանություններին կոչ արել անհետաձգելի միջոցառումներ ձեռնարկել արտահայտվելու, հավաքների և միավորումների նման հիմնարար ազատությունները երկրում պաշտպանելու համար:

Ադրբեջանի ԱԳՆ պաշտոնական ներկայացուցիչ Էլման Աբդուլլաևը, ի պատասխան Փսակիի այդ հայտարարությանն, ասել է. «Ադրբեջանի արտաքին գործերի նախարարությունն անհիմն է համարում ԱՄՆ պետքարտուղարության հայտարարությունը' կապված երկրում մարդու իրավունքների հետ: Նման հայտարարությունները քաղաքական ենթատեքստ ունեն, ուղղված են Ադրբեջանի ներքին գործերին միջամտելուն, երկրի վրա քաղաքական ճնշում գործադրելու նպատակ են հետապնդում և չեն արտահայտում իրականությունը»: