Ալիևը նորից սկսեց հոխորտալ

Օգոստոսի սկզբին հայկական զորքերի դիրքապահների նկատմամբ կատարած դիվերսիոն գործողությունների անհաջողության պատճառած ցնցումից դուրս եկած' Ադրբեջանի առաջնորդ Իլհամ Ալիևը Բեյլագանում երիտասարդության և հասարակայնության ներկայացուցիչների հետ երեկ ունեցած հանդիպման ժամանակ դարձյալ հոխորտացել է և հանդես եկել սին հայտարարություններով:

Ինչպես հաղորդում է «Արմենպրես»-ը, Սոչի մեկնելուց առաջ սեփական բանակին դիվերսիոն գործողությունների մղած Ալիևը, վերագրելով դրանք հայկական կողմին, հանդես է եկել ադրբեջանական բանակի կրած խայտառակ պարտությունը քողարկող հայտարարություններով, թե իբր օգոստոսյան բախումներում «արբեջանական բանակն արժանի հակահարված է տվել թշնամուն»: Սոչիում հանդիպման ժամանակ, սեփական բանակի զինվորների մեծ քանակությամբ կորստից ցնցման մեջ հայտնված Ալիևը դրանք վերագրել է հայերին և հայտարարել, թե, իբր, «շնորհիվ ադրբեջանցի հերոս զինվորների և սպաների արիության, Սոչիում Ադրբեջանի դիրքորոշումը հնչել է ավելի ուժեղ, ինչից հայկական կողմը դեռևս չի կարողանում ուշքի գալ»: Ալիևի այդ հանդիպման մասին հայտնել է «ԱզերԹԱջ»-ը:

Ալիևն ադրբեջանցի երիտասարդների առաջ դարձյալ կրկնել է 10 տարուց ավելի չարչրկած արտահայտություններն այն մասին, թե իբր ադրբեջանական բանակն այնքան «ուժեղ» է, որ նրա դեմ խաղ չկա, որ իրենք կվերականգնեն ինչ-որ «տարածքային ամբողջականություն» և այլ անհեթեթություններ: Ալիևն ադրբեջանական ժողովրդին խոստացել է ավելի մեծացնել 20 տարի միլիարդավոր դոլարների դիմաց զինելուց հետո հայկական ուժերի հետ փոքրիկ բախմանը չդիմացած սեփական բանակի բյուջեն' հույս ունենալով, որ այդպես կարող է ինչ-որ «հաջողության» հասնել:

Սեփական անհաջողություններից վախեցած Ալիևը փորձել է ամեն ինչում մեղադրել Արևմուտքին: Նա ասել է, թե «գլոբալացման քողի տակ որոշ արտասահմանյան շրջանակներ փորձում են իրենց կամքը թելադրել և ապակայունացնել իրավիճակն Ադրբեջանում»: Ալիևը խոսել է միջազգային կառույցների հետ Ադրբեջանի ոչ կառավարական կազմակերպությունների համագործակցության մասին' դրանք անվանելով «թշնամական»: «Իրականում աշխատանքներ են տարվում, որպեսզի երիտասարդությանն ուղղորդեն սեփական պետության դեմ», -ասել է նա:

Ալիևի այդ «նախազգուշացմանը» հետևել է Ադրբեջանի Նախագահի աշխատակազմի ղեկավար Ռամիզ Մեհտիևի այն հայտարարությունը, թե «ճակատում վերջին իրադարձությունների հետ կապված որոշ լրատվական կայքեր օրենքներ են խախտել, մամուլի որոշ օրգաններ լավ չեն աշխատել»:

Ռամիզ Մեհտիևը երեկ հավաքել է պաշտոնական տեղեկատվությունների համար պատասխանատու կառույցների և ԶԼՄ-ների ղեկավարներին, և մեղադրել նրանց տեղեկատվական անվտանգության բնագավառում «Ադրբեջանի ազգային շահերին և օրենսդրությանը հակառակ գործունեություն տանելու, ճակատային գծում իրավիճակի վերաբերյալ սխալ տեղեկություններ և պետական գաղտնիքներ հայտնելու, թշնամու շահերին ծառայող տեղեկությունների արտահոսք թույլ տալու» մեջ:

Մեհտիևը ԶԼՄ-ների ղեկավարներին զգուշացրել և սպառնացել է, որ «անկախ ձևից և բովանդակությունից' Ադրբեջանի անկախության, ինքնիշխանության, տարածքային ամբողջականության և սահմանադրական կառուցվածքի դեմ յուրաքանաչյուր տեղեկություն հայտնած մամուլի օրգան պատժվելու է օրենքի ամբողջ խստությամբ»: Նա ԶԼՄ-ների ներկայացուցիչներին հանձնարարել է «ավելի ընդարձակ և օբյեկտիվորեն լուսաբանել Ադրբեջանի նախագահի կողմից կյանքի կոչվող հաջող քաղաքականությունը»:

Ինչպես երևում է' իրավապաշտպանների, քաղաքացիական ակտիվիստների և լրագրողների զանգվածային ձերբակալություններից հետո սեփական անհաջողությունները ժողովրդից թաքցնելու համար Ադրբեջանի իշխանություններն այժմ էլ աշխատում են լռեցնել ԶԼՄ-ներին: