Սանկտ Պետերբուրգում ստորագրվել է նույնասեռականների իրավունքները ոտնահարող օրինագիծը. աշխարհն ապշած է (տեսանյութ)

Սանկտ Պետերբուրգում ստորագրվել է նույնասեռականության և մանկապղծության քարոզչությունն արգելող օրենքը: Այսուհետ անչափահասների շրջանում նման քարոզչության պարագայում պատասխանատվություն է նախատեսվում,հաղորդում է Вести-ն:

Պետերբուրգի պատգամավորները համապատասխան օրինագիծն ընդունել են փետրվարի 29-ին: Օրենքի հրապարակելուց և ուժի մեջ մտնելուց այն խախտողներին սպառնում է 500 հազարից մինչև մեկ միլիոն ռուբլի տուգանք: Օրինագծի հեղինակները հայտարարել են, որ քարոզչություն ասելով պետք  է հասկանալ ոչ միայն սեռական փոքրամասնությունների կողմից հանրահավաքների և պիկետների անցկացումն, այլև՝ հրապարակային հայտարարությունները, որոնք ուղղված կլինեն անչափահասների շրջանում ոչ ավանդական սեռական հարաբերությունների պոպուլյարիզացիային:

Սեռական փոքրամասնությունների ներկայացուցիչներն արդեն հանդես են եկել նոր օրենքի սուր քննադատությամբ: Իրավապաշտպանները պետերբուրգյան օրենսդիրներին մեղադրում են նույնասեռականների իրավունքների ոտնահարման մեջ, քանի որ ոչ ավանդական սեռական կողմնորոշումն ըստ էության հավասարեցվել է մանկապղծությանը:

Հատկանշական է, որ վերջերս ՄԱԿ-ի Գլխավոր քարտուղար Բան Կի Մունը, ելույթ ունենալով ՄԱԿ-ի Մարդու իրավունքների հանձնաժողովում, կոչ էր արել դադարեցնել նույնասեռականների, բիսեքսուալների և տրանսսեքսուալների նկատմամբ բռնությունների և խտրականության դրսևորումները։ Նա ասել էր, որ սեռական կողմնորոշման նկատմամբ խտրականությունը հանդիսանում է միջազգային իրավունքի կոպիտ խախտում։

Բան Կի Մունը հայտարարել էր նաև, որ պետությունները պետք է պայքարեն սեռական կողմնորոշման պատճառով ի հայտ եկող խտրականության ու հանցագործությունների դեմ և հրաժարվեն ոչ ավանդական սեռական կողմնորոշման քրեականացման պրակտիկայից։

«Դուք՝ իբրև Մարդու իրավունքների հանձնաժողովի անդամներ, պետք է դիմակայեք այս երևույթներին։ Նույնասեռականներին, բիսեքսուալներին ու տրանսսեքսուալներին ես մի բան եմ ուզում ասել՝ դուք միայնակ չեք։ Խտրականության և բռնության դեմ ձեր պայքարը հանդիսանում է մեր ընդհանուր պայքարը։ Ցանկացած հարձակում ձեր վրա հարձակում է ՄԱԿ-ի համամարդկային արժեքների ուղղությամբ... Այսօր ես ձեզ հետ եմ... Ու ես բոլոր երկրներին ու ժողովուրդներին կոչ եմ անում հանդես գալ ձեր պաշտպանությամբ»,-ասել է ՄԱԿ-ի գլխավոր քարտուղարը։

Հատկանշական է, որ Ռուսաստանի մարդու իրավունքների պաշտպան Վլադիմիր Լուկինն իր զեկույցում տարօրինակ է համարել վերոնշյալ օրենքի ընդունումն ու փաստել, որ դրանով ոտնահարվում են մարդու իրավունքները:

Օրենքը խիստ քննադատության է արժանացել նաև ԱՄՆ պետդեպի կողմից: Պետքարտուղար Հիլարի Քլինթոնն, անդրադառնալով խնդրին, մասնավորապես ասել է. «Նույնասեռականների իրավունքները մարդու իրավունքներ են, մարդու իրավունքները՝ նույնասեռականների իրավունքներ»:

Հիշեցնենք, որ մի շարք երկրներում նույնասեռականների իրավունքների պաշտպանությամբ զբաղվող կազմակերպությունները հայտարարել են, որ օրենքն ուժի մեջ մտնելու պարագայում հայտարարելու են համընդհանուր տուրիստական բոյկոտ և երբևէ չեն այցելելու Սանկտ Պետերբուրգ: