Զյուգանովը նախագահական ընտրություններում 24 միլիոն ռուբլիի օգուտ է բերել իր կուսակցությանը

Ռուսաստանի Կոմունիստական կուսակցության ղեկավարությունը հայտարարել է, որ կուսակցության ղեկավար Գենադի Զյուգանովը, որը մարտի 4–ին կայացած ՌԴ նախագահական ընտրություններում երկրորդ տեղն էր զբաղեցրել, դրանով իսկ իր կուսակցության համար վաստակել է 24 միլիոն ռուբլի, հաղորդում է Интерфакс–ը։

«Համաձայն Ռուսաստանում նախագահական ընտրությունների մասին օրենքի, յուրաքանչյուր ձայնի համար, որը կոնկրետ կուսակցության թեկնածուի օգտին է քվեարկվել, պետբյուջեինց այդ կուսակցությանը 20 ռուբլի է հատկացվում։ Իսկ մեր կուսակցության առաջնորդն ընտրություններում ստացել է 12,5 միլիոն ձայն, որից հետո պարզ թվաբանական հաշվարկով պարզվում է, որ միևնույն ժամանակ կուսակցությունը կստանա առնվազն 24 միլիոն ռուբլի», - ասել է Ռուսաստանի Կոմունիստական կուսակցության կենտրոնական կոմիտեի քարտուղար, Պետդումայի պատգամավոր Վալերի Ռաշկինը։

Հիշեցնենք, որ մարտի 4–ին կայացած ՌԴ նախագահական ընտրություններում Կոմունիստների առաջնորդ Գենադի Զյուգանովը ստացել էր 12318353 ձայն կամ ընտրողների 17.18% քվեն՝ զիջելով միայն հաղթանակած Վլադիմիր Պուտինին, որը ստացել էր 45602075 ձայն կամ ընտրողների ձայների 63.60%–ը։