Սանկտ Պետերբուրգի նույնասեռականները շարունակում են պայքարն իրենց իրավունքների համար (տեսանյութ)

Ոչ ավանդական սեռական կողմնորոշում ունեցող անձինք Սանկտ Պետերբուրգի նահանգապետի՝ նույնասեռականության դեմ ուղղված օրինագծի հաստատումից հետո, որը դեռևս ուժի մեջ չի մտել, տեղեկացրել են իրենց հետագա քայլերի մասին:

Հուլիսի 7-ին նրանք կփորձեն նույնասեռականների երթ անցկացնել Պետերբուրգում, որը կհամընկնի Լոնդոնում նույն օրը կայանալիք նույնասեռականների Համաշխարհային երթի հետ: Վերջինս անց է կացվում 5-6 տարին մեկ անգամ, հաղորդում է NEWSru.com-ը;

«Այդ միջոցառումը աշխարհի պատմության ընթացքում նմանատիպ երթերից ամենամեծն է լինելու: Կազմակերպիչների կանխատեսմամբ՝ դրանում մասնակցելու է ավելի քան մեկ միլիոն մարդ»,- ասել է նույնասեռականների իրավունքները պաշտպանող ռուսական կազմակերպություններից մեկի ներկայացուցիչը;

Պետերբուրգյան ակցիայի կազմակերպիչները մտադիր են իրենց գործողություններով հասարակության և իշխանությունների ուշադրությունը սևեռել նույնասեռականների խնդիրների վրա: Իսկ մինչ այդ նրանք պատրաստվում են դիմել տարբեր դատական ատյաններ՝ իրենց իրավունքները պաշտպանելու համար:

Հիշեցնենք, որ Սանկտ Պետերբուրգի նահանգապետ Գեորգի Պոլտավչենկոն մարտի 11-ին ստորագրել է անչափահասների շրջանում ոչ ավանդական սեռական կողմնորոշման քարոզչությունն ու մանկապղծությունն արգելող օրինագիծը, որով նմանատիպ գործողությունների պարագայում օրինախախտին նախատեսվում է պատասխանատվության ենթարկել՝ 500 հազարից մինչև 1 միլիոն ռուբլի տուգանքի տեսքով:

Ավելի վաղ վերոնշյալ օրինագիծը հաստատվել էր քաղաքային խորհրդարանի կողմից, ինչից հետո տեղի ու միջազգային իրավապաշտպաններն իրենց ցասումն արտահայտեցին այդ կապակցությամբ:

Այդպիսով, Պետերբուրգը շուտով կդառնա Ռուսաստանի 4-րդ շրջանը, որտեղ օրենքի ուժով կարգելվի նույնասեռականության մասին բարձրաձայն խոսելը:

Հատկանշական է, որ վերջերս ՄԱԿ-ի Գլխավոր քարտուղար Բան Կի Մունը, ելույթ ունենալով ՄԱԿ-ի Մարդու իրավունքների հանձնաժողովում, կոչ էր արել դադարեցնել նույնասեռականների, բիսեքսուալների և տրանսսեքսուալների նկատմամբ բռնությունների և խտրականության դրսևորումները։ Նա ասել էր, որ սեռական կողմնորոշման նկատմամբ խտրականությունը հանդիսանում է միջազգային իրավունքի կոպիտ խախտում՝ հավելելով, որ նույնասեռականների նկատմամբ խտրականության դրսևորումները հարձակում են համամարդկային արժեքների ուղղությամբ:

Բացի այդ, Ռուսաստանի մարդու իրավունքների պաշտպան Վլադիմիր Լուկինն իր զեկույցում տարօրինակ է համարել վերոնշյալ օրենքի ընդունումն ու փաստել, որ դրանով ոտնահարվում են մարդու իրավունքները:

Օրենքը խիստ քննադատության է արժանացել նաև ԱՄՆ պետդեպի կողմից: Պետքարտուղար Հիլարի Քլինթոնն, անդրադառնալով խնդրին, մասնավորապես ասել է. «Նույնասեռականների իրավունքները մարդու իրավունքներ են, մարդու իրավունքները՝ նույնասեռականների իրավունքներ»:

Հիշեցնենք, որ մի շարք երկրներում նույնասեռականների իրավունքների պաշտպանությամբ զբաղվող կազմակերպությունները հայտարարել են, որ օրենքն ուժի մեջ մտնելու պարագայում հայտարարելու են համընդհանուր տուրիստական բոյկոտ և երբևէ չեն այցելելու Սանկտ Պետերբուրգ: