ՀՀ Կենտրոնական բանկը հավաստագրվել է ISO/IEC 27001:2005 ստանդարտով

2012 թ. հունվարի 19-ին հաջողությամբ ավարտվել է «Bureau Veritas Certification» վկայագրման մարմնի կողմից ՀՀ կենտրոնական բանկի տեղեկատվական անվտանգության կառավարման համակարգը ISO/IEC 27001:2005 ստանդարտին համապատասխանության վկայագրման աուդիտը:

Աուդիտորական խումբն արձանագրել է, որ ներդրման ընթացքում կատարված աշխատանքի արդյունքում Կենտրոնական բանկի տեղեկատվական անվտանգության կառավարման համակարգը լիովին համապատասխանեցվել է ստանդարտի պահանջներին: Տեղեկատվական անվտանգության գործընթացների մեծ մասը որակավորվել է որպես «լավագույն փորձ»:

Հունվարի 24-ին «Bureau Veritas Certification» հավաստագրող կազմակերպությունը պաշտոնապես հայտարարել է ՀՀ Կենտրոնական բանկը ISO/IEC 27001:2005 ստանդարտով հավաստագրելու մասին, իսկ հունվարի 27-ին վերջինիս կողմից թողարկվել է ISO/IEC 27001:2005 ստանդարտին համապատասխանության հավաստագիրը:

Միջազգայնորեն ճանաչում ունեցող այս ստանդարտի ներդրումը վկայում է տեղեկատվական անվտանգության հստակ քաղաքականությանը և պահանջներին Կենտրոնական բանկի հավատարմության մասին:

ՀՀ կենտրոնական բանկի հավաստագրումը դրական կազդի ՀՀ ֆինանսական համակարգում տեղեկատվական անվտանգության մակարդակը միջազգային ստանդարտների պահանջներին համապատասխանեցնելու վրա: