Հիվանդություն չի լինելու, փող է դուրս գրվելու. Հրանտ Բագրատյանը պարտադիր բժշկական ապահովագրության մասին

ՀՀ նախկին վարչապետ Հրանտ Բագրատյանը Լուրեր.com–ի հետ զրույցում բացասական գնահատական տվեց պարտադիր բժշկական ապահովագրության ներդրմանը։ «Նախ պետք է ասեմ, որ դա այն փողն է, որով մարդկանց աշխատավարձ էր պետք բարձրացնել։ Երկրորդ՝ ես գնահատում եմ, որ բժշկական ծառայության փողը մարդը պետք է վճարի կամավոր, և գործատուն», – նշեց նա։ Տնտեսագետի կարծիքով բժշկական ապահովագրության տեսակետից ավելի ընդունելի է ֆրանսիական «Մութուել» տարբերակը, երբ ապահովագրության գումարը վճարում են աշխատակիցը և գործատուն, ոչ թե Հայաստանում կիրառվող ամերիկյան «Մեդիքեր» տարբերակը, երբ գումարն ամբողջությամբ վճարում է պետությունը։  

«Բյուջետային հիմնարկները ձեզ պետք է աշխատավարձ տային, պետք է երկու անգամ բարձրացնեին աշխատավարձը, բայց չեն բարձրացնում։ Ձեր աշխատավարձը գոնե ձեզ տան, ասում են՝ ձեզ չենք տալիս, դրա փոխարեն ձեզ ապահովագրում ենք ձեր իսկ փողով», – մանրամասնեց նա։ Միևնույն ժամանակ Հրանտ Բագրատյանը խորուրդ տվեց այս մտքից չընկնել մոլորության մեջ, թե պետությունը այդ փողը ժողովրդին է տալիս, քանի որ երբեք չի կարող ստուգվել, թե մարդուն պետք էր արդյոք բուժում, թե ոչ, իսկ այդ գումարը, միևնույնն է, դուրս է գրվելու բյուջեից։ «Սա իհարկե կոռուպցիոն ռիսկեր է պարունակում. հիվանդություն չի լինելու, փող է դուրս գրվելու», – նշեց նա՝ հավելելով, որ Միացյալ նահանգներում, որտեղ բժշկական ապահովագրության նույն այս «Մեդիքեր» տարբերակն է գործում, ամենամեծ կոռուպցիոն օպերացիաները կապված են միայն այս համակարգի հետ։