Դադարեցնել «Արմավիա»–ի մոնոպոլիան և դադարեցնել ավիակերոսինի ներմուծման՝ «Զվարթնոց»–ի մենաշնորհը. Հրանտ Բագրատյան

Երկու մոնոպոլիստ բախվել են իրար, չես իմանա՝ ով է ճիշտ. երկուսի սահմանած գներն էլ անընդունելի են։ Այդ կարծիքը «Արմավիա–Զվարթնոց» «հակամարտության» մասին հայտնեց ՀՀ նախկին վարչապետ, «Ազատություն» կուսակցության նախագահ Հրանտ Բագրատյանը, ով նաև կարծիք հայտնեց, որ այս պարագայում մոնոպոլիստներից մեկը՝ «Զվարթնոց»–ը, ավելի ուժեղ դուրս եկավ։ «Երկուսն էլ պետք է մոնոպոլիա չունենային, այս դեպքում մենք այսօր այս վիճակը չէինք ունենա։ «Զվարթնոց»–ից բացի, որպես թռիչքուղի կաշխատեր նաև «Էրեբունի»–ն։ «Էրեբունի»–ից չեն թռչում, որովհետև «Զվարթնոց»–ը կբողոքի, կասի՝ իմ մոնոպոլիան է», – նշեց տնտեսագետը։ 

«Ես կառաջարկեի անմիջապես դադարեցնել Արմավիայի մոնոպոլիան և դադարեցնել բարձր գնով ավիակերոսինի ներմուծման մենաշնորհները՝ տրված օդանավակայանին։ Կամաց–կամաց երկուսն էլ կտուժեին, և  կշահեր ավիացիան», – հարցի լուծման իր տարբերակը ներկայացրեց Բագրատյանը՝ հավելելով, որ այս դեպքում պետք է միջամտի կառավարությունը։ «Նախագահը պետք է նստի հեռուստացույցի առաջ, և ասի, ինչպես Բագրատյանի ժամանակ է եղել, ով որ ուզում է, թող ավիակերոսին ներմուծի», – նշեց նա։

Բագրատյանի վստահեցմամբ «նոր Հայաստան» պետք է կառուցել նման խնդիրներից խուսափելու համար։ «Նոր Հայաստան, մրցունակ Հայաստան, որտեղ փոքր և միջին բիզնեսը կկազմի ՀՆԱ 60%–ը, որտեղ կլինի ոչ թե 12 հազար ակտիվ հարկ վճարող, այլ՝ չորսից հինգ հարյուր հազար», – մանրամասնեց ՀԱԿ անդամը՝ ի պատասախան այն հարցի, թե ի՞նչ է նա հասկանում՝ «նոր Հայաստան» ասելով։ Բագրատյանի խոսքերով՝ օրերս կհրապարակվի նաև ՀԱԿ–ի նոր կարգախոսը, որը կրկնում է հենց այս միտքը՝ «500 հազար ձեռներեցով Հայաստան»։