Մաքսային և հարկային բարեփոխումները քննարկվել են դեղ արտադրողների և ներմուծողների հետ

ՀՀ ԿԱ Պետական եկամուտների կոմիտեն շարունակում է հարկ վճարողների հետ կազմակերպվող հանդիպումներն ու քննարկումները, այդ թվում նաև՝ ըստ առանձին ոլորտների, որոնց նպատակն է բիզնեսի համապատասխան ճյուղի ներկայացուցիչներին ծանոթացնել հարկային և մաքսային բնագավառներում իրականացվող բարեփոխումներին, լսել գործարարներին հուզող խնդիրները, պարզաբանումներ տալ նրանց հուզող հարցերին և փորձել համատեղ լուծումներ գտնել հիմնախնդիրների կարգավորման ուղղությամբ:

Դեղ արտադրողների և ներմուծողների միության կազմակերպած 3-րդ՝ «Առանց փողկապների» երկօրյա հանդիպումը օրերս կայացավ Աղվերանում։ Արդեն ավանդական դարձած հանդիպմանն այս տարի ևս ներկա են գտնվել Հայաստանի դեղագործության ոլորտի բոլոր նշանակալից կազմակերպությունները՝ տեղական արտադրողներ, արտասահմանյան դեղագործական ընկերությունների հայաստանյան ներկայացուցչությունների, ներմուծող ընկերությունների ղեկավարներ, պետական ոլորտի պաշտոնյաներ, փորձագետներ, գիտնականներ։ Նման հանդիպումներին արդեն երրորդ տարին մասնակցել և ելույթներով հանդես են եկել ՀՀ ԿԱ ՊԵԿ ներկայացուցիչները, որոնք դեղագործական ընկերությունների խնդրանքով ներկայացրել են Հայաստանի մաքսային ու հարկային ոլորտներում իրականացվող բարեփոխումները: Այս մասին ասված է ՀՀ ՊԵԿ պաշտոնական կայքում զետեղված հաղորդագրության մեջ։

ՊԵԿ Մաքսային հսկողության վարչության պետ Գևորգ Սաղոյանը, անդրադառնալով մաքսային ոլորտում իրականացվող բարեփոխումներին, նշել է, որ մաքսային ընթացակարգերի պարզեցումը կոմիտեի 2012թ.-ի գերակա խնդիրներից մեկն է: Մասնավորապես, փետրվար ամսից շրջանառությունից հանվել են արտաքին տնտեսական գործունեություն իրականացնողներից պահանջվող 12 փաստաթղթեր, էական փոփոխություններ են կատարվել մաքսային արժեքի որոշման բնագավառում, ինչպես նաև պետական այլ կառույցների հետ համատեղ փորձեր են կատարվում այդ կառույցներից ստացվող թույլտվությունների և հավաստագրերի էլեկտրոնային տարբերակների առաքումն ապահովելու ուղղությամբ: Մեր օրենսդրությամբ դեղերի ներմուծման և արտահանման գործընթացը դեռևս 2004-ից հարմարեցվել էր միջազգային այն գործող չափորոշիչներին, որով այսօր առաջնորդվում են աշխարհի զարգացած երկրները: Անդրադառնալով տեղական արտադրության դեղերի արտահանման խթանմանը՝ Գևորգ Սաղոյանը նշել է, որ արտահանման ծավալների աճը մեր պետության համար կարևոր ռազմավարական խնդիր է և արտահանման խթանումը մեր երկրի առաջնային խնդիրներից մեկն է: Տնտեսության այդ ոլորտը մեզ մոտ բավականին ազատականացվել է և այսօր արտահանման համար մաքսային մարմին անհրաժեշտ է ներկայացնել ընդամենը երեք փաստաթուղթ. արտահանման հաշիվ-ապրանքագիր, միջազգայնորեն ընդունված բեռնագիր և մաքսային մարմիններին ներկայացվող հայտարարագիր: Սա փաստաթղթերի այն նվազագույն քանակն է, որ պահանջվում է ամենազարգացած երկրներում անգամ՝ միջազգային փոխադրումներ իրականացնելու համար: Անդրադառնալով դեղ ներմուծողների խնդիրներին, ՊԵԿ Մաքսային հսկողության վարչության պետը նշել է, որ դեղերի ներմուծման գործընթացում մաքսային արժեքի որոշման ժամանակ կիրառվում է գործարքի գնի մեթոդը, այսինքն, մաքսային մարմինը որպես հիմք է ընդունում այն արժեքը, որը նշված է ներմուծողի կողմից ներկայացված հաշիվ-ապրանքագրում: Ըստ Գևորգ Սաղոյանի, արտաքին տնտեսական գործունեություն իրականացնողների ժամանակի խնայողությունը և տեսուչների հետ շփումների կրճատումը կոմիտեի գործունեության կարևորագույն խնդիրներից են հռչակված:

ՊԵԿ հարկ վճարողների սպասարկման և հարկման ընթացակարգերի վարչության պետ Կարեն Բեգլարյանն իր ելույթում նշել է, որ կոմիտեի որդեգրած քաղաքականության նպատակն է հարկային մարմիններին հարկերը հավաքագրող մարմնից հարկ վճարողներին միջազգային չափանիշներին համապատասխան ծառայություններ մատուցող մարմնի վերածելը: Վերջին տարիներին խոշոր բիզնեսի նկատմամբ ցուցաբերվում է հասցեական մոտեցում՝ ելնելով ռիսկային չափանիշներից: Միաժամանակ «փափուկ» վարչարարություն է կիրառվում փոքր և միջին ձեռնարկատերերի նկատմամբ՝ այսպիսով խրախուսելով հարկերի կամավոր վճարումը:

Հանդիպման ընթացքում դեղ արտադրողների և ներմուծողների ներկայացուցիչները հնարավորություն են ունեցել իրենց հուզող հարցերի պատասխաններն ստանալ Պետական եկամուտների կոմիտեի ներկայացուցիչներից, կազմակերպվել են նաև շահագրգիռ քննարկումներ բնագավառի և կոմիտեի ներկայացուցիչների մասնակցությամբ: