Սաակաշվիլին և Պուտինը հնարավոր է հանդիպեն. Շևարդնաձե

Վրաստանի հոգևոր առաջնորդ Իլյա Երկրորդի շնորհավորական ուղերձը Վլադիմիր Պուտինին նախագահ ընտրվելու կապակցությամբ արդեն նշանակում է, որ երկու երկրների միջև «սկսվել են բանակցություններ»։ Ինչպես հաղորդում է Росбалт–ը, այս մասին ասել է Վրաստանի նախկին նախագահ Էդուարդ Շևարդնաձեն։

Ըստ նրա, Վրաստանի հոգևոր առաջնորդը «իմաստնություն է» ցույց տվել շնորհավորական ուղերձ ուղարկելով, որում նշել է նաև, որ Վրաստանը չի հանդուրժում Աբխազիայի և Հարավային Օսիայի կորուստը։ Ըստ նախկին նախագահի, այդ ուղերձին պետք է հետևեն «երկու երկրների դիվանագետների հանդիպումները»։

Շևարդնաձեն դրանից հետո «հնարավոր է» համարել Ռուսաստանի և Վրաստանի նախագհների հանդիպումը, սակայն նշել է, որ դա ներկայիս նախագահ Միխայիլ Սաակաշվիլիի օրոք քիչ հավանական է։ Ըստ նրա, շատ բան կախված է հոկտեմբերին կայանալիք Վրաստանի խորհրդարանական ընտրություններից, և «եթե Վրաստանի ընդդիմությունը՝ ի դեմս միլիարդատեր Բիձինա Իվանիշվիլիի գա իշխանության, ապա շատ ավելի հեշտ կլինի կապեր հաստատել Ռուսաստանի հետ, բանակցություններ սկսել և հասնել որոշակի արդյունքի»։

«Հիմնական խնդիրը առանց նախապայմանների բանակցություններ սկսելն է», - ասել է Շևարդնաձեն։