Զյուգանովը մեղադրել է Պուտինին ԱՄՆ–ի հետ գաղտնի պայմանավորվածություն ունենալու մեջ

Ռուսաստանի կոմունիստների առաջնորդ Գենադի Զյուգանովը հայտարարել է, որ ԱՄՆ–ը ՌԴ նախագահական ընտրությունների արդյունքները ճանաչել է Ուլյանովսկ քաղաքը՝ ՆԱՏՕ–ի տարանցիկ ճանապարհ դարձնելու պայմանով։

«Ուլյանովսկում ՆԱՏՕ-ի ռազմաբազան Պուտինի նվերն է Միացյալ նահանգներին՝ նախագահական ընտրությունների արդյունքները ճանաչելու դիմաց։ Արդյո՞ք դրա համար չէր, որ Քլինթոնը շնորհավորեց վարչապետ Պուտինին», – Twitter–ի իր էջում գրել է կոմունիստների առաջնորդը։

Հիշեցնենք, որ մարտի 4–ին կայացած Ռուսաստանի նախագահական ընտրություններին հաղթանակ տարավ գործող վարչապետ Վլադիմիր Պուտինը՝ ստանալով ընտրողների 63%–ի աջակցությունը, իսկ երկրորդ տեղում 18%-ով զբաղեցրել էր կոմունիստների առաջնորդ Գենադի Զյուգանովը։

Նշենք նաև, որ ՌԴ նախագահի ընտրություններից հետո ԱՄՆ պետքարտուղար Հիլարի Քլինթոնը հայտարարել էր, որ ԱՄՆ-ը «պատրաստ է աշխատել նորընտիր նախագահ Պուտինի հետ՝ նրա երդմնակալությունից հետո»։