ՀՀ էկոնոմիկայի նախարարն այցելեց Հայաստանում Ռուսհամագործակցության ներկայացուցչություն

ՀՀ էկոնոմիկայի նախարարն այցելեց Հայաստանում Ռուսհամագործակցության ներկայացուցչություն։ Այցի ընթացքում էկոնոմիկայի նախարարը եղավ ներկայացուցչության տարածքում գործող Ինովացիոն համագործակցության ռուս-հայկական կենտրոնում, ծանոթացավ այն նորարարական նախագծերին, որոնք փորձագիտական գնահատական ստանալով երաշխավորվել են ծրագրի օպերատոր հանդիսացող «Սկոլկովո» ինովացիոն հիմնադրամի ծրագրերի գրանցամատյանում ընդգրկվելու համար: Այնուհետև Տիգրան Դավթյանն աշխատանքային քննարկում ունեցավ Ռուսհամագործակցության ներկայացուցչության ղեկավար Վիկտոր Կրիվոպուսկովի հետ:

Քննարկմանը կողմերը անդրադարձան Ինովացիոն համագործակցության ռուս-հայկական կենտրոնի հետագա գործունեությանը, նորարարական ծրագրերի առաջխաղացման գործում Հայաստանի կառավարության մասնակցության հնարավորություններին, ԱՊՀ անդամ երկրների ինովացիոն համագործակցության միջպետական ծրագրին Հայաստանի մասնակցությանը և այլ հարցերին: Էկոնոմիկայի նախարարի խոսքով ներկայացված նորարարական ծրագրերը տնտեսության տարբեր ոլորտներում լայն կիրառությու կարող են ունենալ, և դա վկայում է այն մասին, որ այսօր Հայաստանն ունի այն անհրաժեշտ ներուժը, որը կարող է միջազգային շուկայում պահանջարկ ունեցող արտահանելի ինովացիոն արտադրանք ապահովել:

Հանդիպման ընթացքում Տ. Դավթյանը շեշտեց, որ պետությունն պետք է օգտագործի բոլոր հնարավորությունները նմանատիպ ծրագրերի առաջխաղացման ապահովման ուղղությամբ և հավելեց, որ հայ-ռուսական համագործակցության բարձր մակարդակը թույլ է տալիս տեսանելի արդյունք ակնկալել: