Անապահով ընտանիքների կողմից օգտագործված գազի գումարի մի մասը կվճարի կառավարությունը

Այսօր տեղի ունեցած կառավարության հերթական նիստի ժամանակ գործադիրը որոշեց Հայաստանի Հանրապետության էներգետիկայի և բնական պաշարների նախարարին՝ Հայաստանի Հանրապետության օրենսդրությամբ սահմանված կարգով ապահովել նախարարության համակարգի պետական ընկերությունների նախորդ տարիների գործունեության արդյունքներով հաշվարկված՝ Հայաստանի Հանրապետության պետական բյուջե վճարման ենթակա շահութաբաժնի վճարումից հետո ընկերությունների տրամադրության տակ մնացած, և չբաշխված շահույթների հաշվին 204.872.288 դրամ գումարի վճարումը «ՀայՌուսգազարդ» փակ բաժնետիրական ընկերությանը, որպես ՀՀ կառավարության 2011 թվականի մարտի 31-ի N335-Ն որոշման 1-ին կետում նշված՝ Հայաստանի Հանրապետությունում անապահով ընտանիքների կողմից 2011 թվականի հոկտեմբեր-դեկտեմբեր ամիսներին սպառած բնական գազի համապատասխան քանակության համար մասնակի փոխհատուցման գումարի վճարում՝ հիմք ընդունելով «ՀայՌուսգազարդ» փակ բաժնետիրական ընկերության կողմից ներկայացված համապատասխան տեղեկատվությունը:

Վարչապետը այս որոշումն ընդունելուց հետո նշեց, որ այս ծրագիրը շարունակական բնույթ է կրելու և նպատակն է սոցիալապես խոցելի խավերին օժանդակություն ցուցաբերել պետության կողմից, «որպեսզի մենք ավելի էժան գներով մատակարարենք գազ միչև 300խմ -ի համար պետությունը ցույց է տալիս օգնություն և նրանց համար գործում է 100 դրամ սակագինը, ոչ թէ 136, ինչպես՝ մյուս բնակիչների համար: Եվ սա իր դրական ազդեցությունը ունի, քանի որ քաղաքացիները իրենց ընտանեկան բյուջեները տնտեսել են այս ծրագրի շնորհիվ», - նշեց վարչապետը: