«Ռուսաստանի պետպարտքը չի գերազանցի ՀՆԱ 20 տոկոսը». ՌԴ նախագահի օգնական

ՌԴ նախագահի օգնական Արկադի Դվորկովիչը կարծում է, որ Ռուսաստանի պետպարտքը չի գերազանցի ՀՆԱ 20 տոկոսը։ Նրա խոսքերով՝ Ռուսաստանի նախագահն ու վարչապետը սկզբունքային որոշում են ընդունել բյուջետային կանոնին վերադառնալու մասին, որը ներկայումս պաշտոնապես չի գործում։

«Մենք փաստացիորեն վերադարձել ենք այն սկզբունքներին, որոնցով ղեկավարվել ենք մինչ բյուջետային կարգապահության մասով ճգնաժամը... պաշտոնապես բյուջետային կանոնն այլևս չի գործում, սակայն կա ՌԴ նախագահի և վարչապետի սկզբունքային համատեղ որոշում, որի համաձայն՝ մենք պետք է վերադառնանք բյուջետային կանոնին, որը ներկայումս ձևակերպվում է և կընդունվի մոտ ժամանակներս»,– հայտնել է Դվորկովիչը։

ՌԴ նախագահի օգնականի խոսքերով՝ նորընտիր նախագահ Վլադիմիր Պուտինի նախաձեռնած նախընտրական ծրագրերը չեն հանգեցնի բյուջետային պակասորդի։ «Ֆինանսական կայունությունը չի խաթարվի, մենք խնդիր չենք տեսնում բյուջետային պակասորդի և պարտքերի տեսանկյունից»,– հայտարարել է նա։