Ես ձեզ հետ խոսում եմ ոչ թե որպես նախարար, այլ որպես գործընկեր. ՀՀ գյուղնախարար

ՀՀ գյուղատնտեսության նախարար Սերգո Կարապետյանը խորհրդակցության էր հրավիրել հանրապետության կաթի մթերման և վերամշակման խոշոր ձեռնարկությունների ներկայացուցիչներին՝ քննարկելու կաթի մթերման գնի իջեցման վերաբերյալ վերջին շրջանում նախարարության «թեժ գծով», ինչպես նաև այլ աղբյուրներով ստացվող ահազանգերի ու դժգոհությունների իրական հիմքերը, արտադրողների և մթերողների հարաբերությունների կանոնակարգման խնդիրները։

Նշվեց, որ մարտի 17-ին նախարարությունում կազմակերպված նախորդ հանդիպման ժամանակ կաթի գնի իջեցումը կանխելու ուղղությամբ ձեռք բերված որոշակի պայմանավորվածություններով հանդերձ, ցավոք, գնանկման մասին դժգոհությունները դեռևս շարունակվում են։
«Ես ձեզ հետ խոսում եմ ոչ թե որպես նախարար, այլ որպես գործընկեր, ով, ելնելով գյուղում առկա դժվարություններից և ձեր հնարավորություններից, փորձում է այնպիսի լուծումներ գտնել, որը և գյուղացուն կօգնի, և չի վնասի ձեզ։ Մեր հանդիպման նպատակը շահավետ և ընդունելի պայմանավորվածության ծեռքբերումն է՝ կաթի գնի նվազում թույլ չտալու համար»,- նշել է նախարարը։

Ի վերջո, ծավալված շահագրգիռ երկխոսության ընթացքում ներկայացված համոզիչ հաշվարկների և նախարար Սերգո Կարապետյանի հիմնավոր հորդորների արդյունքում կողմերը հանգեցին վերջնական եզրահանգման՝ պետք է ըստ ամենայնի նպաստել գյուղացուն օժանդակելու պետական քաղաքականության իրականացմանը: