Մեր տնտեսական քաղաքականությունը «կարկատանային» է. Արմեն Պողոսյան

Կիրակի օրը՝ առավոտից, Երևանի բենզալցակայաններում բենզինի բոլոր տեսակների մեկ լիտրը թանկացավ 20 դրամով կամ միանգամից 4 տոկոսով: Ինչո՞վ է պայմանավորված այս թանկացումը հարցին ի պատասխան Լուրեր.com-ի հետ զրույցում, Սպառողների ասոցիացիայի նախագահ Արմեն Պողոսյանն ասաց. «Բանն այն է, որ մենք հեծանիվ հնարողներ չենք: Այդ հարցի լուծումը տրված է շատ վաղուց. մենաշնորհը՝ չարիք է և օրենսդրությունը հենց դրա համար էլ ստեղծված է: Տարբեր երկրներում, նաև մեր երկրում, մենաշնորհի չարաշահման պարզ, դասական օրինակ է սա: Սրա լուծման ձևը գտնված է տնտեսագիտական մտքում և տարբեր երկրներում: Ամենաարդյունավետ ձևերից մեկը ոչ թե թողնում են՝ ով ինչպես, ինչ քանակությամբ ներկրի, այլ քվոտա պետք է սահմանվի: Օրինակ՝ 30 տոկոս և ոչ ավել, 100 տոկոսը տրոհվում է մասերի և այդ քվոտայի համար պետք է մրցակցեն պոտենցիալ ձեռնարկատերերը, ովքեր ուզում են զբաղվել նման բիզնեսով: Մրցակցություն պետք է լինի հենց այդ քվոտայի համար: Սա է լուծման ձևերից ամենաարդյունավետ տարբերակը: Մեզ մոտ երկուսը զբաղվում են այս գործով, մեկինը՝ 40 տոկոսն է, մյուսինը՝ 41 տոկոսը: Սա էլ մենաշնորհային դրսևորման մի ձև է: Մենք ունենք հակամենաշնորհային օրենսդրություն և տնտեսական մրցակցության պետական հանձնաժողով, որոնց լիազորությունները պետք է ավելի գործնական կիրառվի: Օրինակ՝ միջազգային շուկաներում գները ունեն տենդենց՝ թռիչքներ են լինում, բայց հետո անկում էլ է լինում, իսկ մեզ մոտ թռիչքից հետո միանշանակ նաև դեպի աճ է գնում ու երբեք անկում չենք տեսնում: Մեր տնտեսական քաղաքականությունը «կարկատանային» է», - նշեց Արմեն Պողոսյանը: