Ինչո՞ւ չինական և ոչ ֆրանսիական ավտոբուսներ

Սպառողների ասոցիացիայի նախագահ Արմեն Պողոսյանը Լուրեր.com-ի հետ զրույցում խոսեց Հայաստանում առկա տրանսպորտի և վերջերս շրջանառության մեջ դրված չինական ավտոբուսների մասին: «Շատ շուտով մեր տրոլեյբուսը կմեռնի»,- նշեց Արմեն Պողոսյանը՝ հավելելով, որ մեր տրոլեյբուսը հոգևարքի մեջ է: «Չի լինի շուտով, ոնց որ չկա տրամվայ, բայց պետք է լիներ հակառակը: Եթե էլեկտրոտրանսպորտի զարգացում չի նախատեսվում մեր պետության տնտեսական կուրսում, մեր պետության պլանավորման մեջ, զարգացման մեջ չի նախատեսվում, ուրեմն մնացածի մասին խոսելն ավելորդ է: Եթե 20 կամ 220 հատ ավտոբուս վազեց մեր քաղաքում, այն էլ չինական, ի՞նչ շահեցինք մենք, տուժելուց բացի: Ասում են՝ սա ավելի լավն է, քան միկրոավտոբուսը, դա եղավ, որ սա չարյաց փոքրագույնն է, որովհետև դա չարիք է: Ինչքան էլ գովեն, ինչքան էլ փողային նվագախմբով հրապարակում ցուցադրեն: Մեր էլեկտրոտրանսպորտում ժամանակին ծախսվել է 385 մլն կվտ/ժ էլեկտրաէներգիա, դա ցույց է տալիս դրա տեսակարար կշիռը: Քսան տարի անցել է և այդ 380-ը պետք է կրկնապատկվեր, բայց հիմա 100 մլն կվտ/ժ է, պակասել է երեք ու կես անգամ: Ամեն տարի կրկին նվազում է չորս-հինգ տոկոսով: Էլեկտրոտրանսպորտը դեպի մեռնելն է գնում, դեպի զարգացմանը չի գնում: Էլեկտրոտրանսպորտը քիչ վտանգավոր է, քիչ արտանետումներ է տալիս: Այն ոչ միայն շահագործման ժամանակ է քիչ վնաս տալիս, այլ այդ հոսանքը լարերով է վազում և նավթատարերից, գազատարերից, այդ ամեն ինչից ազատում է մեզ: Ավտոտրանսպորտից միլիոնավոր արտանետումներ են լինում, իսկ դրանից մեզ ազատում է էլեկտրոտրանսպորտը:

Օրինակ՝ մեր գիտնականներից մեկը շատ դիպուկ ասել է. «Այն երեխան, որը երթևեկում է միկրոավտոբուսում ծալապատիկ, նա ինչպես պետք է մեզ պաշտպանի վաղը: Նա ընկճված հոգեբանությամբ է մեծանում: Բանն այն է, որ և՛ էկոլոգիական խնդիրներ կան, և՛ տնտեսական, և՛ ռազմական:

Ես շատ եմ աշխատել ու աշխատում քաղաքային իշխանության հետ: Միշտ եղել է նամակագրությւոն, վիճաբանություն, որի արդյունքը դեռ չկա, արդյունքը հակառակն է: Օրինակ՝ ես շատ դեմ էի չինական ավտոբուս ներկրելուն, ինչո՞ւ չինական և ոչ ֆրանսիական: Ասում են՝ նվեր է, իսկ ինչու պայմանները չեն հրապարակվում: Մինչև այս տարվա վերջ դեռ 300 հատ էլ պետք է ներկրեն, արդեն կոմերցիոն. նվեր, զեղչեր, նման բաներ չկան, արդեն այդ 300-ը պետք է գնեն: Սա պայման է, 240-ը պայման է՝ հաջորդ 300-ի համար: Ֆրանսիան մեզ մեծ հաճույքով նման զեղչումներ կաներ: Ինչո՞ւ մենք պետք է չինականը գերադասեինք, այլ ոչ թե ֆրասիականը», - նշեց Արմեն Պողոսյանը: