Ռուսաստանում նույնասեռականներին կպատժեն դաշնային մակարդակո՞վ

Նովոսիբիրսկի շրջանի խորհրդարանը Ռուսաստանի Պետդումա է ներկայացրել մի օրինագիծ, որով առաջարկվում է տուգանել դաշնության տարածքում «անչափահասների շրջանում նույնասեռականության քարոզչություն» իրականացնող անձանց։ Ավելի վաղ՝ 2009-ին, Պետդուման մերժել էր ներկայացված նմանատիպ մի օրինագիծ, սակայն վերլուծաբանների կարծիքով՝ հարցի շուրջ ձևավորված նոր մթնոլորտում սիբիրյան պատգամավորների նախաձեռնությունը կարող է հաջողությամբ պսակվել, հաղորդում է BBC Russian-ը։

Նախօրեին Պետդումա ներկայացված նախագծով սիբիրյան պատգամավորներն առաջարկում են «նույնասեռականության քարոզչությունը» դիտել իբրև ադմինիստրատիվ իրավախախտում և որպես պատիժ սահմանել տուգանք, ընդ որում՝ մասնավոր անձանց պարագայում՝ 4000-5000 ռուբլի, պաշտոնյաների դեպքում՝ 40-50 հազար, իրավաբանական անձանց դեպքում՝ 400-500 հազար ռուբլի։

Հատկանշական է, որ օրինագծում սահմանված չէ, թե ինչ ասել է «նույնասեռականության քարոզչություն»։

2006-ին նմանատիպ օրինագծով հանդես էր եկել Պետդումայի պատգամավոր Ալեքսանդր Չուևը։ Նա առաջարկում էր սահմանել ոչ թե ադմինիստրատիվ, այլ՝ քրեական պատասխանատվություն, ընդ որում՝ նույնասեռականության քարոզչության համար ընդհանրապես, այլ ոչ միայն՝ անչափահասների շրջանում։ Այդ օրինագծով նախատեսվում էր հարաբերականորեն թեթև պատիժ՝ որոշակի մասնագիտական աշխատանք կատարելու արգելք (ուսուցչի, օրինակ)։

Հատկանշական է, որ նախօրեին ներկայացված օրինագծի նախաբանը բառացիորեն համընկնում է 5 տարի առաջ Չուևի կողմից ներկայացված ու Պետդումայի կողմից մերժված օրինագծի նախաբանի հետ։ Նշենք, որ 2009-ին Դուման Չուևի օրինագիծը մերժել էր հենց առաջին ընթերցմամբ։

«Քանի որ ինքնակամ նույնասեռականությունը հանցագործություն չի հանդիսանում, նույնասեռական հարաբերությունների հաստատմանն ուղղված գործողությունները ևս հանցագործություն չեն կարող համարվել»,- Չուևի ներկայացրած օրինագծի վերաբերյալ նման գնահատական էր տվել նախորդ գումարման Պետդումայի Իրավական հանձնաժողովը։

Նույնասեռականության քարոզչությունն արգելող օրենքներ են գործում Ռյազանում, Արխանգելսկում, Կոստրոմայում, իսկ վերջերս նման օրենք ընդունվեց նաև Սանկտ Պետերբուրգում, որը ուժի մեջ է մտել այսօր։

Հատկանշական է, որ Եվրախորհրդարանը 2011-ի դեկտեմբերի 14-ի և 2011-ի փետրվարի 11-ի բանաձևերով դատապարտել է այդ օրենքները։ Ի պատասխան Ռուսաստանի ԱԳՆ-ն հայտարարել էր, որ վերոնշյալ օրենքները չեն խախտում Ռուսաստանի ստանձնած միջազգային պարտավորությունները։

Հիշեցնենք, որ ընթացիկ տարվա մարտին ՄԱԿ-ի Մարդու իրավունքների հանձնաժողովի նիստի ժամանակ ՄԱԿ-ի գլխավոր քարտուղար Բան Կի Մունը բոլոր պետություններին կոչ էր արել դադարեցնել նույնասեռականների, բիսեքսուալների և տրանսսեքսուալների նկատմամբ բռնությունների և խտրականության դրսևորումները՝ հայտարարելով, որ նույնասեռականների նկատմամբ խտրականությունը հարձակում է համամարդկային արժեքների ուղղությամբ։

Բան Կի Մունը հայտարարել էր, որ պետությունները պետք է պայքարեն սեռական կողմնորոշման պատճառով ի հայտ եկող խտրականության ու հանցագործությունների դեմ և հրաժարվեն ոչ ավանդական սեռական կողմնորոշման քրեականացման պրակտիկայից։

«Դուք՝ իբրև Մարդու իրավունքների հանձնաժողովի անդամներ, պետք է դիմակայեք այս երևույթներին։ Նույնասեռականներին, բիսեքսուալներին ու տրանսսեքսուալներին ես մի բան եմ ուզում ասել՝ դուք միայնակ չեք։ Խտրականության և բռնության դեմ ձեր պայքարը հանդիսանում է մեր ընդհանուր պայքարը։ Ցանկացած հարձակում ձեր վրա հարձակում է ՄԱԿ-ի համամարդկային արժեքների ուղղությամբ... Այսօր ես ձեզ հետ եմ... Ու ես բոլոր երկրներին ու ժողովուրդներին կոչ եմ անում հանդես գալ ձեր պաշտպանությամբ»,-ասել էր ՄԱԿ-ի գլխավոր քարտուղարը։

Հատկանշական է, որ Ռուսաստանի մարդու իրավունքների պաշտպան Վլադիմիր Լուկինը Սանկտ Պետերբուրգում վերոնշյալ օրենքի ընդունումն իր զեկույցում տարօրինակ է անվանել ու փաստել, որ դրանով ոտնահարվում են մարդու իրավունքները: Պետերբուրգյան օրենքը խիստ քննադատության էր արժանացել նաև ԱՄՆ պետդեպի կողմից: Պետքարտուղար Հիլարի Քլինթոնը, անդրադառնալով խնդրին, մասնավորապես ասել էր. «Նույնասեռականների իրավունքները մարդու իրավունքներ են, մարդու իրավունքները՝ նույնասեռականների իրավունքներ»: