Նպատակը մեկն է՝ առաջիկա տարիներին կտրուկ բարձրացնել գյուղացիների եկամուտները. գյուղնախարար

«Լինելով ՀՀ նախագահի ուշադրության կենտրոնում, գյուղատնտեսության ոլորտը նախորդ տարում դրական մեծ տեղաշարժ է արձանագրել»,- Լոռու մարզպետարանում համայնքների ղեկավարների հետ տեղի ունեցած հանդիպման ժամանակ, որին մասնակցում Էր նաև մարզպետ Արթուր Նալբանդյանը, այսօր հայտարարեց ՀՀ գյուղատնտեսության նախարար Սերգո Կարապետյանը՝ ընդգծելով, որ այն հիմնականում պայմանավորված էր տնտեսվարողների քրտնաջան աշխատանքով ու կառավարության իրականացրած գործուն ծրագրերով։

Նրա խոսքով՝ գարնանային գյուղատնտեսական աշխատանքներն արդեն կարելի է մեկնարկած համարել, իսկ առաջիկա օրերին, եղանակների տաքանալուն պես, հնարավոր կլինի ամբողջ հանրապետությունում սկսել այն ու ավարտին հասցնել ժամանակին:

Նախարարը ոլորտի զարգացման առաջնահերթություններից կարևորեց գյուղացիների եկամուտների ավելացմանն ուղղված կառավարության աջակցության ծրագրերը, այդ թվում՝
- Համաշխարհային բանկի աջակցությամբ իրականացվող ««Համայնքների գյուղատնտեսական ռեսուրսների կառավարման եւ մրցունակության» ծրագիրը»,
- գյուղական համայնքներին գյուղատնտեսական տեխնիկայի մատակարարման մեխանիզմների կատարելագործումը,
- Եվրոմիության պահանջներին համապատասխան սննդամթերքի անվտանգության օրենսդրական փոփոխությունների իրականացումը և ընթացակարգերի սահմանումը,
- ցածր տոկոսադրույքով վարկերի տրամադրումը, ինչպես նաեւ մատչելի գներով սերմերի, պարարտանյութի, դիզվառելիքի տրամադրումը գյուղացիներին։

«Այս բոլոր միջոցառումների նպատակը մեկն է՝ առաջիկա տարիներին կտրուկ բարձրացնել գյուղացիների եկամուտները»,- ասաց նախարարը։
Նա կարևորեց նաև գյուղմթերքի իրացման խնդրի կարգավորման ուղղությամբ ձեռքբերված առաջընթացը՝ աննախադեպ համարելով հատկապես այն, որ նախորդ տարի ապահովվեց մթերման գումարների ժամանակին վճարումը, բարձրացան մթերման գները։ Արձագանքելով գյուղացիների բողոքին, կապված կաթի գնի անկման հետ, նախարարը հավաստիացրեց, որ խնդիրն իր ուշադրության կենտրոնում է, ժամանակավոր բնույթ է կրում և շուտով հարցին կտրվի դրական լուծում:

Նա ևս մեկ անգամ հիշեցրեց, որ պարարտանյութի մեկ պարկը համայնքներին կհասցվի 6000, իսկ դիզելային վառելիքի մեկ լիտրը՝ 350 դրամով, ներառյալ տեղափոխման ծախսերը:

Անդրադառնալով մարզի անտառների պահպանության խնդիրներին՝ նախարարը անհանգստացնող համարեց անտառային հատումների քանակի վերաբերյալ իրավիճակը, հատկապես նշելով Գուգարքի անտառտնտեսությունում արձանագրված ապօրինի հատումների և հրդեհների հաճախացած դեպքերը, և անտառամերձ համայնքների ղեկավարների հատուկ ուշադրությունը հրավիրեց վիճակի կայունացմանն ուղղված գործնական քայլերի ձեռնարկման անհրաժեշտության վրա: