Նիդեռլանդներում ձերբակալվել է ռուսական հատուկ ծառայությունների գործակալը

Նիդեռլանդներում ոստիկանությունը մարտի 24–ին ձերբակալել է արտաքին գործերի նախարարության 60-ամյա աշխատակցին, որը կասկածվում է կաշառակերության և ռուս լրտեսներին գաղտնի տեղեկատվություն փոխանցելու մեջ։ Նիդեռլանդների գլխավոր դատախազությունը հայտնել է, որ մարտի 30-ին կասկածյալի նկատմամբ 14-օրյա կալանք է կիրառվել։

Ըստ De Telegraaf-ի՝ ձերբակալվածը Ռայմոնդ Պ.–ն է (Ռայմոնդ Պ.–ն հավանաբար Ռայմոնդ Պուտերայն է), որը 2008-ից եղել է Հոնկոնգում Նիդեռլանդների փոխհյուպատոսը։

Մոտ յոթ տարի Պուտերայը գաղտնի տեղեկատվություն է հաղորդել Անդրեաս և Հեյդրուն Անշլագ ավստրացի ամուսիններին, որոնք ձերբակալվել են 2011-ի հոկտեմբերին՝ Ռուսաստանի համար լրտեսություն կատարելու կասկածանքով։ Ըստ գերմանական լրատվամիջոցների՝ Անշլագներին Գերմանիայի ոստիկանությունը բացահայտել է ԱՄՆ–ում ձերբակալված Աննա Չապմանի միջոցով։ Սակայն դեռ հայտնի չէ՝ արդյո՞ք ռուսական հատուկ ծառայություններին նրանց միջոցով գաղտնի փաստաթղթեր փոխանցվել են, թե՝ ոչ։ Պուերայը նաև կասկածվում է ապօրինի զենք պահելու և փողերի լվացման մեջ։ 

Լրատվամիջոցների ուշադրության կենտրոնում դիվանագետը հայտնվել էր 2007-ին, երբ նրա կինը՝ Մետա Պուտերայը, հրաժարվել էր 2000 թ.-ին իրենց որդեգրած կորեացի չորս ամսական աղջկանից՝ նրա հուզական անկայունության պատճառով։ Միևնույն ժամանակ դիվանագետ ամուսինները երկու սեփական զավակներ ունեն։