Կրկին թանկացում կլինի. Արմեն Պողոսյան

«Թանկացումը չարիք է, իսկ չարիքը մշտապես կրկնվում է: Կրկին թանկացում կլինի. մեր ուսումնասիրությունը դրա մասին է ասում»,– այս մասին Լուրեր.com-ի հետ զրույցում ասաց Սպառողների ասոցիացիայի նախագահ Արմեն Պողոսյանը՝ պատասխանելով «հնարավո՞ր է նոր թանկացումներ լինեն» հարցին։ Նրա խոսքերով՝ փոքր ձեռնարկությունները թողնում են ասպարեզը, կամ սննկանում՝ իրականացնելով իրենց թելադրվող քաղաքականությունը:

Ապրիլի 8-ին Հայաստանում նշում են Հիսուս Քրիստոսի հրաշափառ Հարության տոնը, որն ընդունված է անվանել Զատիկ: Տոնի կարևոր և գեղեցիկ ավանդույթներից է ձու ներկելը: «Կթանկանա՞ արդյոք ձուն Զատիկի նախաշեմին, կլինի՞ արդյոք ձվի դեֆիցիտ շուկայում» հարցերին ի պատասխան՝ սպառողների ասոցիացիայի նախագահ Արմեն Պողոսյանն ասաց.

«Էլի կլինի թանկացում: Հիմա մեր թերությունները այնքան շատ են այս ասպարեզում, որ ես չեմ ուզում թվարկել, մենք չենք խթանում, մեր տեղականին՝ մի հանգամանք, որը հաճախ պատժվում է, հատկապես ձվի արտադրանքի ասպարեզում, այսինքն պատժվում են ձեռնարկություններ՝ այս կամ այն թերության կամ անբարեխիղճ մրցակցության համար: Մեծ ձեռնարկությունները դրանով պարգևատրվում են, իսկ փոքրերի համար դա սննկացում է նշանակում»:

Պողոսյանը, անդրադառնալով նաև ձվի ներկրմանը, ասաց. «Եթե լինենք ավելի միասնական, որ փոքր ձեռնարկությունները չտուժե՛ն, չսննկանա՛ն, կհաղթահարենք այս երևույթը: Փոքր ձեռնարկությունները եթե չսննկացան, ուրեմն փոքրացան, կամ փոխեցին պրոֆիլը: Այսօր իրավիճակը հասել է այնպիսի զավեշտի, որ ձու արտադրող ընկերությունը ավելի նպատակահարմար է գտնում ձու ներկրել, ոչ թե արտադրել, սա աբսուրդ է, բայց ցավոք կա այդ երևույթը»:

Պատասխանելով այն հարցին, թե հնարավոր թանկացումների դեպքում կկիրառվե՞ն պատիժներ այդ ընկերությունների նկատմամբ, Պողոսյանն ասաց. «Պարտադիր է պատժի ենթարկել, բայց նախ և առաջ պետք է ուսումնասիրել, թե ի՞նչն է խախտվել, եթե թանկացել է՝ ուրեմն պատճառ կա, եթե պատճառը տրամաբանական է՝ դա մի բան է, եթե անազնիվ մրցակցություն կա՝ դա այլ երևույթ է»:

Հիշելով նախորդ տարվա ընթացքում տեղի ունեցած անբարեխիղճ մրցակցությունը՝ Պողոսյանը նշեց նաև, որ այդ տարվա ընթացքում ցանցում անհետացել էր ձվերի մի մասը. «Պահեստավորման պայմաններում պահել էին արտադրանքը, որպեսզի դեֆիցիտ ստեղծվի շուկայում: Այնպես որ, եթե այս անգամ լինեն անբարեխիղճ մրցակցության երևույթներ, դրանք պետք է պատժվեն՝ օրենքում այդ բոլոր հնարավորությունները և պատժաչափերը կան»,- ասաց Պողոսյանը և ավելացրեց՝ «Պատիժը պետք է հետևի ուսումնասիրությանը»:

Գայանե Համբարձումյան