Բեզինի թանկացումն անպատժելիության և անվերահսկողության արդյունք է. Արմեն Պողոսյան

Եթե պատժեցին 100 մլն դրամով, բայց արդյունք չտվեց, ուրեմն պետք է պարզել, թե ո՞րն է տնտեսական քաղաքականության դաշտում առկա թերությունը, Լուրեր.com-ի հետ զրույցում ասաց սպառողների ասոցիացիայի նախագահ Արմեն Պողոսյանը` խոսելով բենզինի թանկացումների մասին:

Հիշեցնենք, որ երեկ առավոտյան Երևանի բենզալցակայաններում բենզինը կրկին թանկացել է: Մեկ լիտր «Ռեգուլյարը» վաճառվում է 500 դրամով, «Պրեմիումը»՝ 520 դրամով, «Սուպերը»՝ 550 դրամով: Բենզինը թանկացել է միանգամից բոլոր լցակայաններում:

Արմեն Պողոսյանի խոսքերով՝ բեզինի թանկացումն անպատժելիության և անվերահսկողության արդյունք է:

«Պետք է ավելի շատ ճնշենք, որ ավելի հետևողական աշխատեն»,- ասաց Պողասյանը և հավելեց, որ պատժելու մեջ ևս տրամաբանություն պետք է լինի:

Խնդրի լուծման մասին խոսելիս` Պոսոսյանն ասաց. «Բանալին այն է, որ պետք է ներկրողները ներկրեն բենզինը սամանափակված քվոտայով: Պետք է սահմանվի, որ 20-30% իրավունք ունեն ներկրելու: Ներկրողները, տնտեսվարողները պետք է մրցակցեն այդ 20%-ի իրավունքը ստանալու համար, ոչ թե ինչքան ուզեն՝ ներկրեն, հետո էլ իրար մեջ պայմանավորվեն այլ քվոտաների ներկրման ծավալը»:

Անդրադառնալով շուկայում գերիշխող երկու ընկերություններին՝ Պողոսյանը նշեց, որ նրանցից մեկը ներկրում է Հայաստան մտնող բենզինի 41%-ը, մյուսը՝ 40%-ը:

«Ստացվում է անհավասար: Մյուսներին մնում է ավելի փոքր մաս, իսկ մեծի՝ փոքրին ճնշելու ձևերը անվերահսկելի են»,- ասաց Պողոսյանը:

Պողոսյանը նշեց նաև, որ ճիշտ է՝ համաշխարհային շուկայում նավթի գնի աճի տենդեց կա, բայց դա թանկացման պատճառների ընդամենը մի մասն է:

«Համաշխարհային շուկայում նավթի գնի աճը ընդամենը մի մասն է թանկացումների, հիմնական պատճառը մրցակցությունն է, իսկ այդ մրցակցության պայմանը պետք է ընդլայնվի այնպես, ինչպես ես ասեցի՝ սահմանափակված քվոտաներով»,-եզրափակեց Պողոսյանը: