Խոսքի ազատության ոլորտում Հայաստանի համար կարող է ուսանելի լինել Էստոնիայի փորձը. փորձագետ

Խոսքի ազատության պաշտպանության կոմիտեի ղեկավար Աշոտ Մելիքյանը մատնանշում է խնդիրներ, որոնք խոչընդոտում են Հայաստանում խոսքի ազատության ամրապնդումը: Մամուլի ազատության միջազգային օրվան ընդառաջ կայացած մամուլի ասուլիսի ժամանակ Աշոտ Մելիքյանը նշեց, որ համաձայն է մամուլի ազատության վերաբերյալ «Freedom House» կազմակերպության 2014 թվականի զեկույցում Հայաստանի ստացած 61 միավորի հետ, քանÕ « որ նախորդ տարվա համեմատ, երբ Հայաստանի ցուցանիշը 62 միավոր էր, մեծ քայլեր չեն իրականացվել խնդիրները վերացնելու համար:

«Freedom House»-ի դեպքում միավորներն ինչքան բարձր են, այնքան ցածր է երկրի դիրքը խոսքի ազատության մակարդակով: Այդ միավորները ձևավորվում են՝ հաշվի առնելով զանգվածային լրատվամիջոցների գործունեության օրենսդրական դաշտը, քաղաքական պայմաններ, որում գործում են լրատմամիջոցները, ու տնտեսական պայմանները: 0-30 միավորը համարվում է լիովին ազատ, 31-60 միավորը՝ կիսով չափ ազատ, 61-100 միավորը՝ ոչ ազատ: 2013 թվականի զեկույցում Հայաստանը ուներ 62 միավոր, 2014-ին՝ 61 միավոր:

«Ես համաձայն եմ այս գնահատականին, քանի որ մեծ հաշվով ոչինչ չի բարելավվել, եթե համեմատենք նախորդ տարվա հետ: Չնայած սա այն շեմն է, որ բավական է մեկ միավոր պակասի ու մենք կհայտնվենք կիսով չափ ազատների շարքում»,-«Արմենպրես»-ի հաղորդմամբ՝ նշեց Աշոտ Մելիքյանը:

Բանախոսի դիտարկմամբ՝ անհրաժեշտ են օրենսդրական դաշտում փոփոխություններ ու լրացումներ կատարել, մասնավորապես, «Հեռուստատեսության ու ռադիոյի մասին» օրենքում: «Այն մի շարք կետերով չի համապատասխանում այսօրվա պահանջներին, մանավանդ եթե մենք խոսում ենք թվային հեռուստատեսությանն անցնելու մասին: Բացի այդ, շատ վատ միտում է այն, որ լրագրողների նկատմամբ ֆիզիկական բռնությունների դեպքերից որևէ մեկը մինչև վերջ չի բացահայտվել, իսկ մեղավորը չի ենթարկվել պատասխանատվության: Անցյալ տարի գրացվել է լրագրողների դեմ բռնության 9 դեպք, որևէ մեկը պա տասխանատվության չի ենթարկվել»,-հայտնեց բանախոսը:

Աշոտ Մելիքյանը թյուր է համարում այն տեսակետը, թե Հայաստանում խոսքի ազատությունն սահմանվածից ավելին է, երբ նկատի են ունենում զանգվածային լրատվության միջոցներում երբեմն հանդիպող սանձարձակ բնույթի նյութերը: «Շատ հաճախ թացն ու չորը խառնելով, սանձարձակությունը խոսքի ազատության հետ համադրելով՝ ասում են, թե սա չէ խոսքի ազատությունը: Երբ այս կամ այն գործունեության նկատմամբ քննադատությունն ու ոչ հանդուրժողական վերաբերմունքը համարվում է վիրավորանք ու զրպարտություն, դա խանգարում է լրատվամիջոցներևի անկաշկանդ գործունեությանը»,-ասաց խոսքի ազատության պաշտպանության կոմիտեի ղեկավար Աշոտ Մելիքյանը:

Հիմք ընդունելով «Freedom House»-ի ներկայացրած տվյալները, որոնց Աշոտ Մելիքյանն ավելի է վստահում, քան այլ կազմակերպությունների ցուցանիշներին՝ նա նշեց, որ Հայաստանը Վրաստանից հետ է մնում ազատ խոսքի մակարդակով, իսկ անհամեմատ լավ դիրքերում է՝ ի տարբերություն Ադրբեջանի: «Բայց ես չէի ցանկանա, որ մենք Ադրբեջանի հետ համեմատվենք: Մեզ համար ավելի լավ կլինի համեմատվել այնպիսի երկրի հետ, ինչպիսին Էստոնիան է, որը հետխորհրդային երկիր լինելով, հասել է ավելիին, քան օրինակ, մի շարք եվրոպական երկրներ»,-ավելացրեց Աշոտ Մելիքյանը: