Մոսկվայում ձերբակալվել են Ռամզան Կադիրովի երկու թիկնապահներ

Մոսկվայի քաղաքային դատարանը կալանքի որոշում է կայացրել Չեչնիայի ներքին գործերի նախարարության երկու աշխատակիցներ՝ Մուսահաջի Մուսուլաևի և Ջամբուլատ Մուհմատմուրզիևի նկատմամբ, որոնք եղել են Չեչնիայի նախագահ Ռամզան Կադիրովի անվտանգությունը Մոսկվայում ապահովող թիկնապահական խմբի անդամներ, հաղորդում է Росбалт–ը։

Մոսկվայի դատախազությունը Կադիրովի թիկնապահներին մեղադրում է մարդկանց առևանգման և դրամաշորթությամբ զբաղվելու մեջ։ Նրանց հետ միաժամանակ ձերբակալվել է Չեչնիայի նախագահի անվտանգության հարցերով խորհրդական Զելիմխան Իսրայլովը, սակայն նա մի քանի օր անց ազատ է արձակվել։ Ձերբակալվածները համոզված են, որ սադրանքի զոհ են դարձել, որպեսզի հանցագործություն կատարելուց հետո ինքնաարդարացման հնարավորություն ունենան։

Ռուսաստանի անվտանգության ծառայությունների աշխատակիցներից մեկը հայտնել է, որ Չեչնիայի ուժային կառույցների աշխատակիցներին ձերբակալելու հատուկ գործողություններն իրականացվել է ՌԴ նախագահի ընտրություններից 2 օր առաջ, Մոսկվայի «Времена года» ռեստորանում։