Համագործակցության հեռանկար

Այսօր ՀՀ գյուղատնտեսության նախարար Սերգո Կարապետյանն ընդունեց երկօրյա այցով Հայաստանում գտնվող Իսրայելի պետության Կնեսետի անդամ, Իսրայելի գյուղատնտեսության և գյուղական զարգացման նախարար տիկին Օրիթ Նոկեդի գլխավորած պատվիրակությանը: Պատվիրակության կազմում էին նշված նախարարության աշխատակազմի ղեկավար Ուրի Բասոն, արտաքին կապերի վարչության պետ Արիե Ռեգևը, ՀՀ Իսրայելի պետության արտակարգ և լիազոր դեսպան Շմուել Մեյրոմը, Իսրայելի պետության արտաքին գործերի նախարարության դեսպան Գիորա Բեչերը:

Ողջունելով հյուրերին, Սերգո Կարապետյանը համառոտ ներկայացրեց Հայաստանի գյուղատնտեսության այսօրվա նկարագիրն ու ցուցանիշները, նշելով, որ ի տարբերություն Իսրայելի, մեզանում ոլորտը միայն վերջին տարիներին' անկախությունից հետո է բռնել ինտենսիվ զարգացման ճանապարհ, և այստեղ մեզ խիստ անհրաժեշտ է աշխարհի, և մասնավորապես, Իսրայելի պետության, առաջադեմ փորձի կիրառումը:

Շնորհակալություն հայտնելով «Մաշադ» ծրագրի շրջանակներում Հայաստանի գյուղատնտեսության աշխատողների համար վերապատրաստման դասընթացների կազմակերպման և Հայաստանում պարենի միջազգային կազմակերպության միջոցով իրականացվող «Դպրոցական սննդի կազմակերպման» ծրագրին իսրայելական կողմի ակտիվ մասնակցության համար, նախարարը հույս հայտնեց,որ առաջիկայում համագործակցության շրջանակներն ավելի կընդլայնվեն,ներառելով նոր ոլորտներ: Անդրադառնալով գյուղատնտեսության մեջ ակնկալվող գործակցության նոր հեռանկարներին, նա առանձնակի կարևորեց Իսրայելից տոհմային երինջների և կենդանիների պատվաստանյութերի ներկրումը, Հայաստանում կենդանիների արհեստական սերմնավորման իսրայելական ծառայության ստեղծումը, ջրի խնայողական օգտագործման ինտենսիվ տեխնոլոգիաների կիրառումը' ինչպես ոռոգման համակարգում, այնպես էլ ձկնաբուծության մեջ, գյուղատնտեսական ռիսկերի ապահովագրման համակարգի և գյուղատնտեսական կոոպերացիաների ստեղծման իսրայելական հարուստ փորձի օգտագործումը մեզանում:

«ամագործակցությունը պետք է երկկողմանի լինի, կարծում եմ, մեզ մոտ նույնպես ձեզ հետաքրքրող ոլորտներ կան, օրինակ, հայկական մրգի և բանջարեղենի, վերամշակված գյուղատնտեսական մթերքների, կոնյակի և գինիների արտահանումը Իսրայել կազմակերպելու հարցը: Աշխարհին է հայտնի, թե ինչպիսի համային և որակական հատկնիշներ ունեն դրանք: Մանավանդ, հայկական ծիրանը, որի պահանջարկը գնալով մեծանում է: Կարող ենք համակողմանի օժանդակություն ցուցաբերել նաև իսրայելցի այն գործարարներին, որոնք ներդրումներ կկատարեն Հայաստանի գյուղատնտեսության ոլորտում: Ինքներդ էլ կարող եք համոզվել, որ մեզ մոտ բավականին նպաստավոր պայմաններ են ստեղծվել բիզնես ծրագրերի իրականացման համար»,-նշեց նախարարը:

Շնորհակալություն հայտնելով ջերմ ընդունելության համար, տիկին Օրիթ Նոկեդը իր հայ գործընկերոջը հրավիրեց մայիսին կատարել պաշտոնական այցելություն Իսրայել, ուր և հնարավորւոթյուն կունենա մասնակցել նախատեսվող խոշոր գյուղատնտեսական ցուցահանդեսին: «Երկու երկրների գյուղատնտեսության ոլորտների համագործակցության համաձայնագիրն արդեն պատրաստ է, և ես հույս ունեմ, որ այդ օրերին մենք կվավերացնենք կարևոր այդ փաստաթուղթը»,- նշեց նա:

Հանդիպման ավարտին կողմերը պայմանավորվածություն ձեռք բերեցին համագործակցության ակնկալվող ուղղությունների և ծրագրերի մշակման աշխատանքային խմբերի ստեղծման և վերջիններիս համակարգողների նշանակման մասին:

Գյուղատնտեսության նախարարությունից հետո պատվիրակությունն այցելեց Եղեռնի հուշարձան, ծաղկեպսակ դրեց անմեղ զոհերի հիշատակին, եղավ Երևանի կոնյակի գործարանում, ծանոթացավ Մատենադարանի գանձերին, որտեղից էլ մեկնեց Մայր Աթոռ սուրբ Էջմիածին, արժանացավ Ն. Ս. Օ. Տ. Տ. Գարեգին Բ Ծայրագույն Պատրիարքի ընդունելությանը: Օրվա վերջին պատվիրակությանն ընդունեց ՀՀ վարչապետ Տիգրան Սարգսյանը: