Պետք է հաշվի առնել, որ գալու է մայիսի 7-ը. Թաթուլ Մանասերյան (տեսանյութ)

«Այլընտրանք» հետազոտական կենտրոնի ղեկավար, տնտեսագետ Թաթուլ Մանասարյանը բնական է համարում, որ ընտրություններից առաջ կուսակցությունները պետք է փորձեն շատ հավակնոտ նպատակներ դնել և խոստումներ տալ։

«Ընտրությունները միշտ էլ այդպես են՝ խոստումների առումով, բայց ես տեսնում եմ նաև առաջխաղացում՝ այն առումով, որ, օրինակ, նախորդ ընտրություններին ես շատ թվեր չեմ հիշում կուսակցությունների կողմից ներկայացված», – նշեց նա՝ պատասխանելով Լուրեր.com–ի այն հարցին, թե որ կուսակցության նախընտրական ծրագրի տնտեսական բլոկն է իր պատկերացմամբ իրագործելի։

Ըստ Մանասերյանի՝ այս ընտրություններում մի քանի կուսակցություններ այդ փորձն արել են, և ընտրողներին ներկայնում են որպես կոնկրետ հաշվարկ արած, ծրագիր ներկայացնող կուսակցություններ։

«Ոմանք ելնում են իրենց փորձից (իշխանական կուսակցությունները) և փորձում են ավելի իրատեսական ներկայացնել այդ թվերը, ոմանք՝ ավելի շատ ձայներ գրավելու համար», – նշեց նա։

Տնտեսագետը ցավով նկատեց, որ նախընտրական շրջանում ձգտում կա աշխատատեղերի խնդրին անդրադառնալ և մեծ թվով աշխատատեղեր խոստանալ մարդկանց։

«Շատ ավելի վստահությամբ եմ հակված վերաբերվել այն ծրագրերին, որտեղ ասվում է, որ կաջակցեն այնպիսի միջավայրի ստեղծմանը, որը  թույլ կտա սեփական նախաձեռնությունները առաջ տանել և մարդիկ՝ անհատ ձեռներեցներ, իրենց համար աշխատանք կգտնեն», – նշեց նա։ 

Թաթուլ Մանասերյանը ավելի հակված է սցենարների մշակման և ներկայացման տարբերակին։

«Ի՞նչ կլինի, օրինակ, եթե Իրանում լինի պատերազմ: Բոլոր ծրագրերը կարող են հօդս ցնդել։ Եվ հակառակը, եթե խաղաղ հանգուցալուծում լինի, այդ դեպքում ի՞նչ է մեզ սպասվում։ Եթե Հայաստանը ներգրավվի տարածաշրջանային ծրագրերին, ի՞նչ է մեզ սպասվում, եթե հայ–թուրքական հարաբերութունները կարգավորվեն, ի՞նչ կլինի», – նշեց նա՝ հավելելով, որ այդ սցենարներից պետք է բխեցնել տնտեսական ծրագրերը։

Այնուամենայնիվ, ըստ տնտեսագետի, առաջընթաց կա։

«Ներգրավված են մասնագետներ, որոնք թույլ չեն տալիս շատ քաղաքականացնել տնտեսական ծրագրերը։ Սա շատ կարևոր է, քանի որ պետք է հաշվի առնել, որ գալու է մայիսի 7-ը և մարդիկ սպասելու են խոստումների իրականացմանը, ինչը նշանակում է, որ պետք է արդեն հաշվետու լինեն թվերով, թե ինչ է արված և ինչ կարող են հետագայում անել»,– եզրափակեց նա։