Մաքսային ռեժիմների մի զգալի մասը, ըստ մաքսային վիճակագրության մեթոդաբանության, չի համարվում արտաքին առևտուր

Զանգվածային որոշ լրատվամիջոցներ իրենց վերլուծական հրապարակումներում անդրադարձել են մաքսային ծառայության հրապարակած վիճակագրական ցուցանիշներին՝ համադրելով դրանք ազգային վիճակագրության ծառայության ցուցանիշների հետ, ուստի թյուրըմբռնումից խուսափելու նպատակով անհրաժեշտ ենք համարում պարզաբանել, որ ՀՀ Մաքսային ծառայությունը արտաքին առևտրի մաքսային վիճակագրությունը վարում է հաստատված մեթոդաբանության հիման վրա, որտեղ սահմանված են առևտրային և ոչ առևտրային մաքսային ռեժիմների առանձնահատկությունները, որոնց համաձայն էլ տվյալ ներմուծման կամ արտահանման գործարքը համարվում է արտաքին առևտրային գործունեություն կամ չի համարվում այդպիսին:

Ի տարբերություն ազգային վիճակագրության ծառայության մեթոդաբանության, մաքսային ռեժիմների մի զգալի մասը, ըստ մաքսային վիճակագրության մեթոդաբանության, չի համարվում արտաքին առևտուր և չի ընդգրկվում արտաքին առևտրի վիճակագրական ցուցանիշների մեջ:

Ըստ մաքսային վիճակագրության, արտաքին առևտուր չի համարվում օրինակ «վերաարտահանում՝ նախկինում ժամանակավոր ներմուծումից հետո» մաքսային ռեժիմը, այդ ռեժիմով 2012թ. մարտ ամսին Գերմանիա է վերաարտահանվել «Airbus A319111» ինքնաթիռ, ինչն էլ հանդիսանում է մաքսային ծառայության և ազգային վիճակագրության ծառայության տվյալների տարբերության պատճառ:

ՀՀ ՊԵԿ լրատվական ծառայություն